Նոր Գեղիում հանձնաժողովի անդամի ու դիտորդի միջև տեղի ունեցած փոքր միջադեպը հարթվել է. Դավիթ Խաժակյան
Կոտայքի մարզի Նոր Գեղի համայնքում ընտրությունների ժամանակ փոքրիկ միջադեպ է տեղի ունեցել հանձնաժողովի անդամի և դիտորդի միջև, որը հարթվել է։ Այս մասին իր Facebook-ի էջում հայտնել է Երևանի ավագանու «Լույս» խմբակցության ղեկավար Դավիթ Խաժակյանը, ով համայնքում հանդես է գալիս հանձնաժողովի անդամի դերով։ Նոր Գեղիում մրցապայքարին մասնակցում է 3 թեկնածու։
«Խնդիրը հարթված է, դիտորդը խմբագրել է իր գրառումը, ես էլ հանձնաժողովի անդամներին խնդրել եմ առավելագույնս բարիդրացիակամ հարաբերություններ պահպանել:
Որպես «Լուսավոր Հայաստան» կուսակցության` տեղամասային ընտրական հանձնաժողովների կազմավորման պատասխանատու տեղեկացնում եմ, որ Նոր Գեղի համայնքի 28/2 տեղամասում գտնվող «Ականատես» դիտորդական խմբի ներկայացուցիչը, ակնհայտորեն չտիրապետելով իր դերակատարման նշանակությունը, այդ տեղամասում լարվածություն է առաջացրել հանձնաժողովի շրջանում և քաղաքական գնահատականով է հանդես եկել ֆեյսբուքում` անհարկի շահարկելով «Լուսավոր Հայաստան» կուսակցությանը: Դիտորդի շահարկման առարկան եղել է այն, որ հանձնաժողովի անդամը իր ազատ ժամին փոխարինել է հանձնաժողովի մեկ այլ անդամի, որը տվյալ պահին այդտեղ չի եղել:
(Կներեք, որ հանձնաժողովի անդամը ևս մարդ է և կարող է գնալ քվեարկության, կամ սնվել, կամ ծխել, կամ հոգալ իր այլ կարիքներ…)
Որքան կարևոր է դիտորդական առաքելության դերը, նույնքան էլ կարևոր է, որպեսզի դիտորները տիրապետեն իրենց լիազորություններին և քաղաքական շահարկումներից զերծ մնան»,–գրել է Խաժակյանը ՝ նշելով, որ միջադեպը եղել է «Ականատես» դիտորդական խմբի անդամ Ծովինար Դանիելյանի հետ։