Մենք չենք ուզում մի պետության հետ մեր կապերը զարգացնել մեկ այլ գործընկերոջ հետ հարաբերությունների գնով. Փաշինյանի հարցազրույցը
Գերմանական Die Zeit շաբաթաթերթին տված հարցազրույցում ՀՀ վարչապետ Նիկոլ Փաշինյանն անդրադարձել է արտաքին քաղաքականությանը վերաբերող հարցերին: Մասնավորապես, գերմանացի լրագրողին հետաքրքրել է, թե ինչպե՞ս է պատրաստվում Փաշինյանը հարաբերությունները պահպանել Հայաստանի անվտանգության երաշխավոր հանդիսացող Ռուսաստանի հետ, միաժամանակ սերտ հարաբերություններ կառուցել ԵՄ հետ:
«ԵՄ-ում մեր Եվրոպացի գործնկերներն անձամբ են մեզ բացատրել, որ մենք պետք է ընտրություն չկատարենք ԵՄ և Եվրասիական տնտեսական միության միջև: Մեր բարեփոխումների ընթացքում մենք ապավինում ենք ԵՄ աջակցությանը, և մեր ռուսաստանցի գործընկերները տեղյակ են այդ մասին»,- ասել է Փաշինյանը:
Այնուհետև լրագրողն անդրադարձել է տարածաշրջանային խնդիրներին: Խոսելով Իրանի հետ լավ հարաբերությունները պահպանելու Հայաստանի ցանկության մասին՝ նա ասել է, որ ԱՄՆ-ն ճնշումներ է գործադրում Իրանի հետ հարաբերությունների վրա, ապա հարցրել՝ ինչպիսի՞ն է Հայաստանի դիրքորոշումը:
«Ես այս ամիս պաշտոնական այցով Իրանում էի: Մեր 4 հարևաններից երկուսի՝ Թուրքիայի և Ադրբեջանի հետ սահմանները փակ են: Մեր միջազգային բոլոր գործընկերները տեղյակ են, որ մենք մյուս երկու հարևանների՝ Իրանի և Վրաստանի հետ առանձնահատուկ հարաբերություններ ունենք, և դրանք պահպանելը մեզ համար բացարձակ առաջնահերթություն է: Ցանկացած պետություն իրավունք ունի մեկ այլ պետության հետ լավ հարաբերություններ ունենալ, բայց ԱՄՆ-ն մեզ համար կրկնակի կարևոր է: Մենք չենք ուզում մի պետության հետ մեր կապերը զարգացնել մեկ այլ գործընկերոջ հետ հարաբերությունների գնով»,- ընդգծել է Հայաստանի վարչապետը:
Նա խոսել է նաև Թուրքիայի հետ դիվանագիտական հարաբերություններ կառուցելու վերաբերյալ՝ նշելով, որ Հայաստանը չի սահմանում նախապայմաններ՝ ի տարբերություն Թուրքիայի: Փաշինյանն ասել է՝ Թուրքիայի առաջ քաշած նախապայմանները վերաբերում են երրորդ երկրի հետ մեր հարաբերություններին:
Լրագրողը հարց է ուղղել, թե արդյո՞ք Փաշինյանը նկատի ունի Ադրբեջանը, քանի որ «Հայաստանը հարևանների հետ հակամարտության մեջ է Լեռնային Ղարաբաղի պատճառով»:
«Դա ողբերգական իրավիճակ է: Մենք պատրաստ ենք Թուրքիայի հետ մեր հարաբերություններն առանց նախապայմանների կառուցել, եթե Թուրքիան պատրաստ է դրան»,- շեշտել է վարչապետը: