Փողոցային առևտրով զբաղվող քաղաքացիները խոստանում են վաղվանից կտրուկ քայլերի դիմել
Այսօր դարձյալ բողոքի ցույց են անցկացրել փողոցային առևտրով զբաղվող քաղաքացիները, ովքեր նախ` հավաքվել են կառավարչության առջև, որից հետո գնացել Երևանի քաղաքապետարան:
«Պայմանավորվածություն ենք ձեռք բերել, որ մարդաշատ վայրերում կառուցվեին ռտաղավարներ, որպեսզի մարդիկ անցնեին հարկային դաշտ և նորմալ պահմաններում աշխատեին: Ամիսուկես անց լսում ենք՝ քննարկում կլինի, կլինեն պատասխաններ: Այսօր, եթե մեր պետությունը չի կարողանում ապահովել արժանապատիվ նպաստով, թոշակով, մարդը ստիպված դորս է գալիս փողոց: Հավատում ենք, որ ժամանակ է պետք, մտնում ենք վիճակի մեջ, բայց տվեք էդ ժամանակը մեզ էլ, մենք աշխատենք»,- ասաց առևտրականներից Կարեն Դադոյանը:
Մեկ այլ առևտրական արդեն Էրեբունի վարչական շրջանից վստահեցրեց, որ իրենք ժամանակին կառուցել էին տաղավարներ հենց քաղաքապետարանի պահանջով, բայց հետագայում կրկին հայտնվել են փողոցում:
«Նախ` այդ փողոցային բառն արդեն սխալ է, դրսում առևտուր էինք անում, բայց մենք երեք տարի ամեն անգամ դիմել ենք, որ մեզ տաղավար հատկացնեն, մեզ դուր չի եկել այդ ձևով առևտուր անենք, մենք Էրեբունիում կառուցեինք տաղավարները իրենց նախագծով, մեկ օր հետո արգելեցին: Էրեբունիում շուկա չկա, մեզ ասում են` գնացե´ք Կայարան: Ոնց քարշ տամ էդ ապրանքը Կայարան»,-ասաց կինը:
Հավաքվածները դժգոհում էին, որ կառավարությունը դեռ որևէ աշխատատեղ չստեղծած՝ քաղաքացիներին զրկում են եկամուտի աղբյուրից: Քաղաքացիները որոշել են շարունակել բողոքի ակցիան: Կարեն Դադոյանը, ով բանակցել էր քաղաքապետարնի աշխատակիցների հետ ու որևէ վստահելի խոստում չէր ստացել, նշեց, որ վաղն առավոտյան ժամը 11.30-ից շարունակելու են իրենց բողոքի ակցիան քաղաքապետարանի առջև:
«Կտրուկ քայլերի ենք գնալու, եթե կառավարությունը չի լսում: Չէ՞ որ էդ կառավարությունը ձևավորվել է այս ժողովրդի միջոցով»,- նշեց առևտրականը: