Ինչո՞ւ էին վարորդներն առավոտյան հրաժարվում դուրս գալ աշխատանքի և ինչպե՞ս է լուծվելու քաղաքային տրանսպորտի խնդիրը. պարզաբանում քաղաքապետարանից
Երևանի քաղաքապետարանի կողմից տրանսպորտի ոլորտում կատարվող փոփոխությունները, մասնավորապես տնօրենի փոփոխությունը, հարուցել է վարորդների դժգոհությունը, ինչի հետևանքով էլ նրանք որոշ ժամանակով դադարեցրել էին իրենց աշխատանքը: Այս մասին ասաց քաղաքապետարանի լրատվության վարչության պետ Հակոբ Կարապետյանը:
«Քաղաքապետը բավական երկար զրույց է ունեցել անձնակազմի հետ, ներկայացրել է ապագայի պրոյեկտները, հավաստիացրել է, որ գործող աշխատակիցների համար ոչ մի խնդիր չի լինելու, հակառակը, մարդիկ եթե այս պահին աշխատում են 12 ժամ, աշխատելու են 8-ժամյա ռեժիմով, վարձատրության մեջ բարելավումներ են լինելու և այլն: Ընդլայնվելու են ընկերության գործառույթները, բայց այդ մարդկանց կարելի է հասկանալ, որ անձնական կապվածություն ունեն տնօրենի հետ, բայց նոր լուծումները, տեխնոլոգիական զարգացումը նոր կադրեր են պահանջում, և այդ տրամաբանության մեջ տեղի է ունեցել փոփոխություն, իսկ վարորդների խնդիրները զուտ անձնական կապվածության մակարդակում են, որ մեր տնօրենը շատ լավն է, մի փոխեք»,-փոխանցեց Կարապետյանը:
Նրա վստահեցմամբ՝ տնօրենն աշխատանքից ազատվել է իր դիմումի համաձայն, առանց որևէ առարկության: Իսկ ինչպես նախապես հայտարարվել էր, քաղաքի տրանպորտային պարկից երթուղի է դուրս բերվելու ևս 70 չշահագործված ավտոբուս: Թե ինչ ավտոբուսներ են դրանք և ինչպես են բաշխվելու, Կարապետյանն ասաց.
«12 թ-ին, երբ 270 ավտոբուս Չինաստանից որպես օգնություն տրվեց քաղաքին, դրանցից 70-ը չեն օգտագործվել, քաղաքապետի որոշմամբ կներդրվի երթուղի՝ ավելացնելով քաղաքի երթուղիների ցանցը: Դրանք կլինեն, կավելացվեն նոր երթուղիներ, կամ միկրոավտոբուսային երթուղիները կդառնան ավտոբուսային կամ արդեն գոյություն ունեցող ավտոբուսային երթուղիներում կհամալրվեն, դա տեխնիկական խնդիր է, որը մոտակա օրերի, շաբաթների ընթացքում կլուծվի»:
Սա միջանկյալ լուծումներից մեկն է, որ նախատեսում է քաղաքապետարանը, քանի դեռ հիմնական լուծում չի եղել Երևանի տրանսպորտային ցանցում:
Իսկ թե որ հատվածները կսպասարկեն նոր ավտոբուսները, քաղաքապետարանը կքննարկի և լրացուցիչ կտեղեկացնի քաղաքացիներին: