Ե՞րբ կդադարեցնի հացադուլը Հովհաննես Գալստյանը

«Տատիկիս վարսերը» ֆիլմի կինոռեժիսոր Հովհաննես Գալստյանը, ով արդեն 12 օր է` ինչ հացադուլի մեջ է, այսօր լրագրողների համար ընթերցել է «Տատիկիս վարսերը» ֆիլմի միջազգային արտադրողների կոչը Հայաստանի հանրությանը, իշխանություններին և բիզնես շրջանակներին։

Գալստյանն ընթերցել է կոչը, որտեղ իրեն կոչ են անուն դադարեցնել հացադուլը: Կոչում նաև նշված է՝

1.Հայաստանի հանրությանը՝ սատարել մեր գործընկերոջը և աջակցել ֆիլմին,
2.Հայաստանի իշխանությանը՝ պատավորոցնել կինոյի պետական կառույցին՝ կատարելու ֆիլմի հանդեպ ստանձնած իր պարտավորությունները,
3.Հայաստանի գործարար շրջանակներին՝ մասնակցել միջազգային շուկայում հայտնվելու շրջանակներ ունեցող և Հայաստանին պատիվ բերող ֆիլմի արտադրությանը,
4.Հայաստանի և միջազգային լրատվամիջոցներին՝ լուսաբանել ֆիլմի խնդիրները:
Ինչ վերաբերում է հացադուլը դադարեցնելուն, ապա կինոռեժիսորն ասել է, որ ավելի է կոշտացնելու քայլերը, գործադիրից իրեն ոչ մեկ չի այցելել, այցելել են միայն օրենսդիրից:

«ՀՀ կառավարությունը հումանիզմի չափաբաժին չունի, ես կոչ եմ անելու Հայաստանի իշխանությանն անհապաղ փրկել իր դեմքը, դա Հայաստանը ներքաշելու է միջազգային դատավարության մեջ: Ես դիմում եմ նաև հասարակությանը, բանկում բացվելու է հաշվեհամար, կոչ եմ անում, խնդրում եմ ամենափոքր չափաբաժնով աջակցեք այս ֆիլմին, հետո կասեմ` ինչի համար: Դիմում եմ նաև պաշտոնյաներին` ձեր փետրվար ամսվա աշխատավարձը փոխանցե՛ք և աջակցե՛ք ֆիլմին, քանի որ նաև ձեր մեղքով չեն կատարվում պարտավորությունները: Դիմում եմ նաև բիզնես ոլորտին՝ մի՛ կասկածեք այս ֆիլմի հաջողությանը և սատարե՛ք այս ֆիլմին: Ինչի՞ համար է այս ամենն անհրաժեշտ, որովհետև հասարակական աջակցությունը միակ ուղին է, որը ես տեսնում եմ հացադուլը դադարեցնելու համար», – ասել է կինոռեժիսորը՝ հավելելով, որ ամենևին թշնամանք չունի որևէ մեկի հանդեպ, հացից հրաժարվելը մարդուն բարի է դարձնում:

«Երբ նվազագույն գումարը`10 մլն դրամը հավաքվի և իշխանություններից լինեն երաշխիքներ, ես կդադարեցնեմ, հակառակ պարագայում` իմ մոտ նաև վրաններ կավելանան:

Ես թույլ չեմ տա, որ իմ ֆիլմը տապալեն չինովնիկական բթամտության պատճառով»,-ավելացրել է կինոռեժիսորը: