Մենք հրաժարվեցինք «պադավատապետությունից». Հովհաննես Հովհաննիսյան
Հայաստանի ԱԺ «Իմ քայլը» խմբակցության անդամ Հովհաննես Հովհաննիսյանը, փետրվարի 14-ին խորհրդարանում ելույթ ունենալով, նշեց, որ տնտեսական հեղափոխությունը կարևոր կոնցեպտ է, բայց էլ ավելի անհրաժեշտ է մշակութային հեղափոխություն, որովհետև այն, ինչի մասին խոսում են, ժողովրդի ու կառավարության միջև փոխադարձ վստահության առկայությունն իրականում մշակութային հեղափոխություն է: Պատգամավորն ասաց, որ ՀԴՄ կտրոնի ու տատիկի մասին ԱԺ ամբիոնից ասված խոսքերն այլաբանություն էին, իրականում այստեղ խոսքը վստահության մասին է:
Նրանց, ովքեր ասում են՝ ոչինչ չի փոխվել, Հովհաննիսյանն արձագանքեց՝ մեր երկրում շատ բան է փոխվել, ստացել ենք ազատություն:
«Ժողովուրդները միլիոններով զոհվել են մեկ գաղափարի՝ «ազատության» համար: Ֆրանսիական հեղափոխության հիմքում այդ նույն ազատությունն էր»,- ասաց նա:
Պատգամավորը նշեց՝ կրթությունը կարևոր նախապայման է մանիպուլյացիաներից խուսանավելու համար, ապա տեղեկացրեց՝ ԿԳՆ-ում պատրաստվում են փոփոխություններ կրթական ծրագրի մեջ, արդեն մեդիագրագիտության հետ կապված նախաձեռնություն կա: Հովհաննիսյանի խոսքով՝ մեդիագրագիտությունն այսօր առավել քան անհրաժեշտ է մեր ժողովրդին՝ տարատեսակ մանիպուլյացիաներից խուսափելու համար, քանի որ դրանց ենթարկվելը նաև ազգային անվտանգության խնդիր է:
Հովհաննիսյանի գնահատմամբ՝ հաճախ ուղղորդում կա, առանձին պատգամավորներ, կառավարության անդամներ թիրախ են դառնում, ոմանք փորձում են պատգամավորի կամ կառավարության անդամի վարկը գցել, փոքր խնդիրները շահարկել, լուն ուղտ դարձնել:
«Այսօր չեն կարող խոսել կեղծված ընտրությունների մասին. ազատ և արդար ընտրությունները նոր Հայաստանի ամենամեծ ձեռքբերումն են: Ասում են՝ ՀՀԿ-ի օրոք այդպես չէր, ուրեմն գնացե՛ք, միացե՛ք ՀՀԿ-ին, վայելե՛ք»,- ասաց նա:
Պատգամավորը նաև հիշեցրեց՝ մայր բուհը՝ ԵՊՀ-ն, այս տարի նշում է 100-ամյակը, ընդգծեց՝ պետք է մեծ ուշադրություն դարձնել այդ հոբելյանին, դա կլինի ուշադրություն նաև կրթության նկատմամբ:
«Մենք հրաժարվեցինք «պադավատապետությունից», կրճատվեցին ծառայողական մեքենաները, կառավարությունը հայտարարեց, որ մոտ 5 միլիարդի չափով խնայողություն է տեղի ունենում, կարծում եմ՝ այդ գումարների մի մասը կարելի է ուղղել գիտությանը և փորձել ճիշտ ցուցիչների միջոցով նաև արդյունք ակնկալել դրանից»,- ասաց պատգամավորը: