Արտակարգ իրավիճակների ոլորտում ՀՀ ԱԻ նախարարության և ՄԱԿ-ի Զարգացման ծրագրի համագործակցությունը շարունակական է
Արտակարգ իրավիճակների նախարար Ֆելիքս Ցոլակյանն փետրվարի 13-ին ընդունել է ՄԱԿ-ի Զարգացման ծրագրի (ՄԱԶԾ) մշտական ներկայացուցիչ Դմիտրի Մարիասինին: Հանդիպման նպատակն էր քննարկել Արտակարգ իրավիճակների նախարարության և ՄԱԿ-ի Զարգացման ծրագրի հետագա համագործակցության հեռանկարները: Այս մասին տեղեկացրին ՀՀ ԱԻՆ տեղեկատվության և հասարակայնության հետ կապերի վարչությունից։
Հաղորդագրության մեջ նաև նշված է. «Շնորհակալություն հայտնելով հանդիպման համար՝ ՄԱԶԾ մշտական ներկայացուցիչ Դմիտրի Մարիասինը շնորհավորեց Ֆելիքս Ցոլակյանին ԱԻ նախարարի պաշտոնում վերանշանակվելու կապակցությամբ և
վերահաստատեց ՄԱԶԾ-ի կողմից ստանձնած պարտավորությունը՝ աջակցելու
Հայաստանի կառավարությանը աղետների ռիսկի կառավարման ոլորտում արդյունավետ
համակարգի ներդրման ուղղությամբ, ինչպես նաև փաստեց, որ արտակարգ
իրավիճակների ոլորտում մի շարք ռազմավարական ուղղություններով երկու
կառույցները բարեհաջող համագործակցում են:
Այս առնչությամբ ԱԻ նախարար Ֆելիքս Ցոլակյանը նշեց, որ փոխգործակցությունը լավ է ընթանում, և գնահատելի է այն աջակցությունը, որ ստացվում է ՄԱԶԾ-ի կողմից:
Հանդիպման ընթացքում կողմերը քննարկեցին համատեղ իրականացվող մի շարք
ծրագրերի ընթացքը: Մասնավորապես, անդրադարձ եղավ արտակարգ դեպքերի,
պատահարների դեպքում անօդաչու թռչող սարքերի (ԱԹՍ) կիրառման, անտառային,
դաշտային և քաղաքային հրդեհների արդյունավետ հրդեհաշիջման, հակակարկտային
պաշտպանության միասնական համակարգի ստեղծման, «Նաիրիտ» գործարանում առկա
վտանգավոր քիմիական նյութերի անվտանգ պահպանման ու հետագա չեզոքացման
հարցերին:
Անդրադառնալով արտակարգ դեպքերի և պատահարների ժամանակ կիրառվող
տեխնիկային՝ նախարար Ֆելիքս Ցոլակյանն իր խոսքում նշեց, որ տեխնոլոգիաները
զարգանում են, շատ կարևոր է, որ արտակարգ դեպքերի և պատահարների ժամանակ
կիրառվող տեխնիկան ճիշտ գործածվի: Անօդաչու թռչող սարքերի կիրառումը ԱԻ
նախարարության համար ևս անհրաժեշտություն է:
Հակակարկտային պաշտպանության միասնական համակարգի ստեղծման հարցը
քննարկելիս ԱԻ նախարարն ասաց, որ կառավարության կառուցվածքային
փոփոխություններից հետո հնարավոր կլինի ավելի առարկայական քննարկել այն:
Դմիտրի Մարիասինին իր հերթին նշեց, որ ՄԱԶԾ-ի փորձագետները պատրաստ են
մասնագիտական կարծիք ներկայացնելու հակակարկտային պաշտպանության
համակարգերի վերաբերյալ: Այս առումով պայմանավորվածություն ձեռք բերվեց, որ
փորձագիտական կարծիք կներկայացվի ԱԻ նախարարությանը:
Հանդիպման ավարտին ՄԱԶԾ մշտական ներկայացուցիչ Դմիտրի Մարիասինը նաև
փոխանցեց ՄԱԶԾ պատրաստակամությունը աջակցելու ԱԻ նախարարությանը մասնակցել մայիսին Ժնևում կայանալիք Աղետների ռիսկի նվազեցման գլոբալ ֆորումին:
Հայաստանի պատվիրակությունը 2018թ. նոյեմբերին մասնակցել է Աղետների ռիսկի
նվազեցման Եվրոպայի ֆորումին, որտեղ քննարկումներ են ծավալվել համայնքային
դիմակայունության, ԱՌՆ ոլորտում կայուն ներդրումների, ԿԶՆ և կլիմայի փոփոխության օրակարգերին ներդաշնակ Սենդայի գործողությունների ծրագրի իրականացման, Սենդայի գործողությունների ծրագրի մոնիթորինգի գործընթացի և մի շարք այլ առանցքային հարցերի վերաբերյալ: Ֆորումի շրջանակներում մի շարք քննարկումներում ներկայացվել է նաև Հայաստանի փորձը»: