Ընդդիմությունն իրավունք չունի փոխել կառավարության ծրագիրը, քանի որ դրա քաղաքական պատասխանատուն կառավարությունն է․ Ատոմ Ջանջուղազյան

Ֆինանսների նախարար Ատոմ Ջանջուղազյանը չի հասկանում, թե ինչու են վիրավորել խորհրդարանականները Կառավարությունից։ Նա ԱԺ-ում լրագրողների հետ զրույցում նաև նշեց, որ համակարծիք չէ ԼՀԿ խմբակցության ղեկավար Էդմոն Մարուքյանի հետ, ըստ որի՝ առանց խորհրդարանական ուժերի հետ նախապես կառավարության ծրագիրը քննարկելու ԱԺ ներկայացնելն անհարգալից վերաբերմունք է խորհրդարանական ուժերի նկատմամբ.

«Ես վստահ չեմ, որ ինձ հայտնի է այդպիսի ավանդույթ, իսկ ընթացակարգային իմաստով վստահ չեմ, որ այդպիսի կարգավորում կա, որը դա պարտադիր է դարձնում: Ստացվել է այնպես, ինչպես ստացվել է, բայց դրանից հետևություն անել, որ արհամարհանք կա, կարծում եմ, առնվազն չափազանցված է:

Համենայն դեպս, ես՝ որպես կառավարությունը ներկայացնող, չունեմ որևէ մոտիվացիա ոչ հարգալից կամ արհամարհական վերաբերմունք ունենալ որևէ պատգամավորի նկատմամբ՝ անկախ նրա քաղաքական հայացքներից»,- ասաց նախարարը։
Նախարարի խոսքով՝ այսօր ԱԺ-ն բավականին ակտիվ քննարկում է կառավարության ծրագիրը։ Ջանջուղազյանը վստահեցրեց, որ կառավարությունը չի կարող անտեսել խորհրդարանը, քանի որ ԱԺ պատգամավորը նախևառաջ ինստիտուտ է, իսկ ինքն անհարգելից վերաբերմունքի մոտիվացիա չունի։

Ինչ վերբերում է ԱԺ-ի կողմից կառավարության ծրագրում փոփոխություններ անելուն, նախարարն ասաց․ «Հիշենք, որ խոսքը վերաբերում է կառավարության ծրագրին, որի քաղաքական պատասխանատուն կառավարություն է։ Ընդդիմությունն իրավունք չունի փոխել կառավարության ծրագիր, բայց դրա համար պատասխանատու լինի կառավարությունը։ Ծրագրի նկատմամբ վերահսկողության իրավունք ունի, բայց ոչ այն փոխելու»։

Նախարարը չի հասկանում այն քննադատության հիմքը, թե հստակ չէ՝ ով է գրել կառավարության ծրագիրը։ Նա նշեց, որ գաղտնիք բացահայտած չի լինի՝ ասելով, որ կառավարությունը հավաքական մարմին է, գործնականում բոլորը ներգրավված են եղել ծրագիրը կազմելու մեջ։

Հիշեցնեք, որ երեկ ԱԺ-ում լրագրողների հետ ԼՀԿ խմբակցության ղեկավար Էդմոն Մարուքյանը հայտարարել է, որ ծրագիրն այսպես խորհրդարան բերելով՝ Կառավարությունը խախտել է Սահմանադրությունը և արհամարհական վերաբերմունք ցուցաբերել խորհրդարանի նկատմամբ։