Երկրապահը իշխանության ծառա դառնալ չի կարող. Սասուն Միքայելյան
Դահլիճում բավականին մարդիկ էին հավաքվել, երևի 99-ից հետո այդքան երկրապահ չէր հավաքվել, ոչ մեկ դեմ չեղավ իմ թեկնածությանը։ Այսօր ԱԺ-ում լրագրողների հետ զրույցում հայտնեց ԱԺ «Ելք» խմբակցության պատգամավոր, ՔՊ վարչության նախագահ Սասուն Միքայելյանը՝ անդրադառնալով ԵԿՄ նախագահի պաշտոնում իր թեկնածության։
«Ես հիմա ԵԿՄ նախագահ չեմ, քննարկման արդյունքում, թե ով կարա ղեկավարի հետագայում, կլինի համագումար և որոշում կկայացվի»,- ասաց նա։
Սասուն Միքայելյանը խոստանում՝ ԵԿՄ նախագահի ընտրվելու դեպքում կառույցը 90 տոկոսով փոխելու է։ Նա հիշեցրեց, որ ինքը ԵԿՄ-ի հիմնադիրներից մեկն է, 1993-ին եղել է վարչության 11 անդամներից մեկը, իսկ ԵԿՄ մինչև 1990-ը բավականին լավ կառույց է եղել։
«Այն ժամանակ կառույցը կարողացել է ներկայացնել մարդկանց գործունեությունը պատերազմական շրջանում և դրանից հետո։ Մի օրինակ բերեմ՝ ազատամարտն ազատագրել է 10 400 քառակուսի կիլոմետր տարածք, իսկ այդ ժամանակահատվածում՝ մինչև 94-ը, զոհվել է 6007 մարդ, դա փառքի արժանի գործունեություն է, որը ծավալել են մեր ազատամարտիկները, իսկ գլխավոր դերում եղել են երկրապահները։ Մենք պետք է կարողանանք այդ ամեն ինչը՝ արժեքների կուրսը այսօր ճիշտ ներկայացնել ժողովրդին, որովհետև մենք պատմություն ունենք, գրեթե 700 տարի հետո առաջին անգամ հող ենք ազատագրել, ինչը ճիշտ չի մատուցվել ժողովրդին, ինչի պատճառով այսօր ժողովուրդը երկրապահին այլ աչքերով է նայում»,- մանրամասնեց Միքայելյանը։
Հարցին՝ ԵԿՄ-ն չի՞ կուսակցականացվի՝ հաշվի առնելով, որ Դուք ՔՊ վարչության նախագահն եք, Սասուն Միքայելյանը պատասխանեց, թե ինքը կուսակցության վարչության նախագահ է ընտրվել 2 տարով. սա կուսակցության կանոնադրությունն է։ Ըստ նրա՝ ժամկետն ավարտվում է, և ՔՊ-ն նոր համագումար է անելու, որտեղ իրեն այլևս վարչության նախագահ չեն ընտրի։
«Ինչ վերաբերում է նրան, որ երկրապահը կկուսակցականացվի, ասեմ՝ ոչ, նման բան իմ դեպքում չի կարող լինել, պարզ ասում եմ։ Արդեն մեր ժողովուրդ առնչվել է այդ հարցին, չեմ ուզում անուններ տալ։ ԵԿՄ-ն կյանքի գնով եղել է ժողովրդի ծոցից ծնված կազմակերպություն ու իր գործունեությունն է ծավալել, այն դեմ չի եղել պետությանը»,- շարունակեց պատգամավորը։
Ինչ վերաբերում է Նիկոլ Փաշինյանի իշխանությանը վտանգ սպառնալու դեպքում ԵԿՄ-ի հնարավոր միջամտությանը, Սասուն Միքայելյանը շեշտեց, թե երկրապահը երբեք չի խանգարի կառավարությանը, բայց նաև չի խառնվի քաղաքական հարցերին։
«Երկրապահը չի կարող դառնալ իշխանության ծառա»,- ընդգծեց պատգամավորը։
Միքայելյանն, անդրադառնալով դիտարկմանը, որ իրավապաշտպան Ավետիք Իշխանյան արդեն զուգահեռներ է անցկացնում իր և Մանվել Գրիգորյանի միջև՝ նկատելով, որ 2-ն էլ սեփականատեր են, որդիները քաղաքապետ, նշեց, թե դա զուտ Իշխանյանի կարծիքն է։
«Ես չգիտեմ՝ Ավետիք Իշխանյան ինչ գիտի, ես ինչ սեփականություն ունեմ, ասել եմ՝ նկարեք ժողովրդին ցույց տվեք,ես ի՞նչ խոշոր սեփականատեր եմ, բայց դա էդ մարդու կարծիքն է։ Զուգահեռները պետք չէ անցկացնել, զուգահեռներ թող անցկացնեն մի տարի հետո, եթե ես ընտրվեմ, կտեսնեք։ Իմ որդիներին ոչ մեկի հետ մի համեմատեք, իրան գիտեք՝ ինչ ձև են ապրել, ինչ դժվարության միջով են անցել, բայց չեմ ուզում ոչ մեկին վիրավորեմ»,- եզրափակեց Սասուն Միքայելյանը։