Ռոբերտ Քոչարյանին մեղսագրված չէ, որ նա մարտի 1-ին ցուցում է տվել ուժ կիրառել այնտեղ գտնվողների նկատմամբ. Հայկ Ալումյան
2008 թվականի մարտի 1-ի առավոտյան ոստիկանությունն ստիպված է եղել ուժ կիրառել ու ցրել ցույցը և այս զարգացման մասին ՀՀ երկրորդ նախագահ Ռոբերտ Քոչարյանը մյուս օրն առավոտյան է միայն տեղեկացել։ Այսօր հրավիրված ասուլիսին հայտարարեց Ռոբերտ Քոչարյանի պաշտպան Հայկ Ալումյանը:
Հայկ Ալումյանը պնդեց, որ այդ իրադարձությունների ժամանակ հրահանգված է եղել, որ բացառվի Ազատության հրապարակում գտնվող ցուցարարների նկատմամբ բռնության կամ ուժի որևէ կիրառում։
Ըստ փաստաբանի՝ այնտեղ պետք է կատարվեր զննում, որովհետև օրեր շարունակ ստացվում էին օպերատիվ տեղեկություններ, որ ոմանց մոտ առկա են զենքեր, ընդհուպ մարտական ինքնաձիգեր, մարտական նռնակներ:
«Այդ օրը՝ առավոտյան լուսադեմին, ոստիկանությունը մոտեցել է այդտեղ, որպեսզի կատարի նախատեսած գործողությունը: Սակայն երբ ոստիկանական ուժերը մոտեցել են և հայտարարել իրենց նպատակների մասին, ոստիկանների ուղղությամբ քարեր են նետվել և դիմադրություն է ցուցաբերվել, և ոստիկանությունն ստիպված է եղել ուժ կիրառել, որը մինչ այդ նախատեսված չէր»,-ասաց նա:
Հայկ Ալումյանը նշեց, որ անգամ վարույթ իրականացնող մարմինը՝ քննչական մարմինը, չի համարում, որ Ռոբերտ Քոչարյանը ցուցում է տվել, որ այնտեղ գտնվողների նկատմամբ ուժ կիրառվի: Հետևաբար, այդպիսի կետ նրան մեղսագրված չէ:
Ի պատասխան հարցի, թե ում հրահանգով է տեղում ուժ կիրառվել, Հայկ Ալումյանն ասաց, որ այդ տեղեկությանը չի տիրապետում, բայց ավելացրեց, որ եթե ոստիկանությունը գործողություն է կատարում, իրավունք ունի ուժ կիրառել։ Ըստ նրա՝ խնդիրը նրանում է, որ դա պետք է լինի համաչափ:
Փաստաբանը նաև նշեց, որ «Սաղաթելյանն ընդդեմ Հայաստանի Հանրապետության» գործում Մարդու իրավունքների եվրոպական դատարանը գտել է, որ ուժը կիրառված է եղել անհամաչափ, այսինքն՝ խոսվում է միայն համաչափության մասին: