Տաքսիների հայկական շուկայի 70-80 տոկոսը մոնոպոլացված է. ՀԿ ղեկավար
Հայաստանում տաքսիների շուկայի 70-80 տոկոսը մոնոպոլացված է։ Այս մասին փետրվարի 8-ին լրագրողների հետ հանդիպման ժամանակ ասել է Հայաստանի տաքսի ծառայությունների գործատուների ճյուղային միության նախագահ Վահագն Սահակյանը։
Նրա խոսքով՝ մոնոպոլացումն աստիճանաբար վերածվում է օլիգոպոլիայի, ինչը կարող է կործանարար լինել տաքսի ծառայության ամբողջ ոլորտի համար։ «Մի քանի հազար տաքսի ծառայություններ, ըստ էության, գործունեություն են ծավալում, որը խախտում է հակամենաշնորհային ոլորտի օրենքները»,- նշել է նա։
Սահակյանն ընդգծել է, որ «Յանդեքս տաքսին», երբ նոր էր սկսել գործունեությունը հայկական շուկայում, աշխատում էր այնպիսի սակագներով, որոնք ակնհայտորեն պետք է վնասաբեր լինեին, եթե պահպանվեին բոլոր պահանջները, նույնը վերաբերում է նաեւ «Յու տաքսուն»։ «Յուրաքանչյուր մեքենայի վրա ծախսվում է ամսական առնվազն 30 հազար դրամ՝ հաշվառած հարկերը։ Սա վկայում է այն մասին, որ սակագները, որոնցով աշխատում է «Յանդեքս տաքսին», փոխհատուցվում էին ընկերության հաշիվներից, որպեսզի աստիճանաբար դուրս մղեն մրցակիցներին շուկայից՝ դրանով իսկ դեմպինգ իրականացնելով։ Իսկ «Յու տաքսու» ներկայացուցիչները հայտարարում են, թե իրենց ընկերությունը վճարում է հարկեր 15 մլն դրամի չափով այն դեպքում, երբ գրանցված է մոտ 10 հազար ավտոմեքենա։ Ստացվում է, որ ընկերությունը մոտ 285 մլն դրամ պակաս է վճարում, քանի որ 10 հազար ավտոմեքենայի համար ընկերությունը պետք է վճարեր առնվազն 300 մլն դրամ»,- ավելացրել է ՀԿ նախագահը։
Նա ասել է, որ օնլայն տաքսաչափիչները չեն կարող լինել չափման միջոց, ինչպիսին են սովորական չափիչները, քանի որ դրանք չեն ենթարկվում ստուգման պետական մարմինների կողմից։ «Բնական է, որ նման անհավասար պայմաններում շուկայի բոլոր մասնակիցների համար հավասար պայմանների մասին խոսելն անիմաստ է։ Անհրաժեշտ է ներդնել լիցենզավորման հստակ մեխանիզմներ եւ միասնական համակարգ»,- ամփոփել է Վահագն Սահակյանը։