Դեր ունի՞ մարդկային շփումն Արցախյան հակամարտության հարցում, թե՞ գործում է միայն քաղաքական կամքը

Այսօր International alert միջազգային կազմակերպության փորձագետների հրապարակած զեկույցի ներկայացման ընթացքում լրագրող Մարկ Գրիգորյանը, ով ևս մասնակցել է զեկույցի կազմման ընթացքում կատարված ուսումնասիրություններին, նշեց, թե կա քաղաքական մոտեցում հակամարտությանը և իրատեսական մոտեցում: Ըստ նրա դիտարկումների՝ զեկույցի շրջանակներում ոչ ոք չէր առարկում խոսել երեք հանրությունների մասին, որովհետև իրականությունն այն է, որ այս երեք հասարակությունները կան:

Իսկ զեկույցի արդյունքներից է այն, որ գնահատեցին, որ հակամարտությունը դառնում է արժեք, որից չենք հրաժարվում, պահում ենք և ապրում, ըստ նրա՝ այս միջավայրում մեծանում է մի ամբողջ սերունդ, ում համար հակամարտությունը նորմա է:

«Ես կուզենայի ավելացնել փախստականներին, որոնք որևէ ձևով ներգրավված չեն գործընթացում, չնայած հակամարտությունը բոլորից շատ ազդել է հենց նրանց վրա, դա էլ է հակամարտության ֆենոմենը, և հակամարտությունը դառնում է առևտրի առարկա: Չեն խոսում դիվանագիտական բանակցությունների մասին, մեր ուղեղներում հակամարտությունն առևտրի առարկա է: Ի՞նչ կստանամ, եթե հրաժարվեմ հակամարտությունից: Եվ շատերը պատերազմը տեսնում են որպես հանգուցալուծող երևույթ»,-ասաց նա:

Ըստ նրա՝ մեր հասարակության մեջ քննարկումը ընթանում է մի հարցի շուրջ՝ Նիկոլ Փաշինյանը հողերը կտա՞, թե՞ չի տա: Խոսելով շփումներից՝ ասաց.

«Ես ինքս պատերազմից հետո երկու անգամ եղել եմ Բաքվում, երկու անգամ հանդիպել ու թեյ եմ խմել Հեյդար Ալիևի հետ: Ինչպե՞ս է լինում կոնֆլիկտի լուծումը, մարդկային շփումների՞ց, թե՞ քաղաքական, դիվանագիտական որոշումներից: Կա երկու տարբերակ. քաղաքական գործիչները պնդում են, թե մինչև չլինի քաղաքական որոշում, ոչ մի շփում, իսկ երկրորդը` սկսել մարդկային շփումը, սահմաններն ընդարձակել, և դա կազդի քաղաքական գործիչների վրա: Այստեղ նշված է մի քանի ճանապարհ. խոսում են բիզնեսի մասին, սփյուռքերի շփման մասին: Մենք գիտենք, որ հայ-ադրբեջանական հակամարտությունը մնում է փակագծերից դուրս, երբ մարդիկ ապրում եմ Մոսկվայում և այլուր: Ես ունեմ շատ զգույշ վերաբերմունք սահմաններն ընդլայնելու հարցում, որովհետև դրանք պետք է ընդլայնվեն խելամիտ ձևով, հասարակությունն այսօր հակամարտությունը լուծելու հնարավորություն չունի, պետք է քաղաքական կամք»,-նշեց նա: