Գիտությունը կղզիացած յոլա է գնում, իսկ կառավարությունը մեծ միջոցներ է ծախսում, փորձագետներ է հրավիրում. վարչապետ
Գիտական և գիտատեխնիկական գործունեության բյուջետային ֆինանսավորման կարգը 2019 թ. կպահպանվի, սակայն տարվա կեսին կմշակվի և կառավարությանը կներկայացվի նոր կարգ: Կառավարության այսօրվա նիստին հայտարարեց Հայաստանի կրթության և գիտության նախարար Արայիկ Հարությունյանը:
«Տարվա ընթացքում հետևողական կլինենք՝ հասկանալու բազային ֆինանսավորման արդյունավետությունը և նոր առաջարկ կներկայացնենք: Ներկայումս պետությունը չի հետևոում այն արդյունքներին, որոնց համար տալիս է ֆինանսավորում»,- ասաց նախարարը:
Նիկոլ Փաշինյանը նշեց, որ այս մեխանիզմի փոփոխությունը ճակատագրական է մեր գիտության զարգացման համար: Նա նաև նշեց, որ ամենամեծ խնդիրը իրականության, կյանքի, տնտեսության, անվտանգության պահանջների և գիտության միջև կապի խզումն է:
«Մենք պետք է հասկանանք՝ ինչ ենք ակնկալում մեր գիտությունից, գիտություն էլ հասկանա՝ ինչ ենք ակնկալում իրենից ու գնանք մեխանիզմեր ստեղծելու ճանապարհով: Մի կողմից ասում ենք, որ գիտության ֆինանսավորումը բավարար մակարդակի չէ և արդյունքները ևս, բայց երբ ինչ-որ բան ուզում ենք փոխել, սկսում են արձագանքներ ու պարզվում է, որ բոլորը առանձնապես դժգոհ չեն նրանից ինչից բոլորը դժգոհում են: Ասում են՝ լավ, հեղափոխություն էր, անցավ, տեղի կունենա դարձ ի շրջանս յուր: Այսպիսի ակնկալիքները սին են: Պետք է գնանք ռեալ փոփոխություններ անելու ճանապարհով: Քիչ փողով շատ արդյունք ստանալու մեխանիզմը պետք է ունենանք»,- ասաց նա:
Վարչապետը նաև նշեց, որ պետք է լուրջ համագործակցել գիտանականների հետ՝ բուհական գիտական հետազոտական աշխատանքմների մեկտեղումն է այն հայեցակարգային բազան, որի վրա պետք է հիմնվի խնդիրների լուծումը:
«Մենք երբեք չենք հիշում, որ տնտեսագիտական համալսարաններ ունենք, մեր խնդիրների լուծումը գուցե փնտրենք այնտեղ, դրամաշնորհներն ուղղենք մեր գիտնականներին: Այն բոլոր հարցերը, որ մենք փնտրում ենք, պետք է մեր գիտական միջավայրին արտապատվիրակենք, ներսում հարցերի պատասխանները պետք է ստանանք: Գիտնականներն էլ իրենց պետք է ներգրավված զգան այս բարեփոխումների գործընթացին: Գիտությունը կղզիացած յոլա է գնում, իսկ կառավարությունը մեծ միջոցներ է ծախսում, փորձագետներ է հրավիրում, որ խնդիրները լուծի»,- ասաց նա: