Մեզ հնչեցվող մեղադրանքների հիմքում ոչ թե ժողովրդի, այլ տնտեսվարողների սեփական շահերով մտահոգված լինելն է. ՛՛Հուռնետ՛՛ ՍՊԸ-ի պատասխանը՝ քաղաքացիներին
Ինչպես արդեն հայտնել էինք, քաղաքացիները բաց նամակ-բողոքով էին հանդես եկել անձնագրային բաժնում մատուցվող ծառայությունների վերաբերյալ:
Մեղադրանքներին ի պատասխան ներկայացնում ենք ՛Հուռնետ՛՛ ՍՊԸ-ի Գործադիր տնօրեն Ա. Թովմասյանի բաց նամակը.
«Հարգելի՛ համաքաղաքացիներ, Ստիպված եմ արձագանքել վերջին շրջանում իմ ղեկավարած ընկերության գործունեության շուրջ ծավալված աղմուկին և շահագրգիռ անձանց կողմից հնչեցված անհիմն մեղադրանքներին: Նախ և առաջ, նշեմ, որ ՛՛Հուռնետ՛՛ ՍՊԸ-ն ծավալում է իր գործունեությունը ՀՀ օրենսդրությանը համապատասխան և անհրաժեշտության դեպքում կարող եմ հրապարակել բոլոր փաստաթղթերը: Իսկ շրջանառությունը թաքցնելու մասին խոսք անգամ լինել չի կարող:
Մեր գործունեության առաջնային նպատակն է հնարավորինս մատչելի գներով և առավելագույն հարմարավետությամբ մատուցել ՀՀ քաղաքցիներին անհրաժեշտ ծառայությունները։ Ներկայումս ՀՀ քաղաքացին հնարավորություն ունի՝ անձնագրային բաժանմունքի տարածքը չլքելով, կարճ ժամանակում և ցածր ծախսերով ստանալ իրեն անհրաժեշտ բոլոր ծառայությունները: Օրինակ՝ 8 լուսանկարի դիմաց ընդամենը 500 դրամ վճարելով (նախկինում 4 լուսանկարի դիմաց 1000 եւ ավել դրամ վճարելու փոխարեն) :
Այս հնարավորությունը մեզ ընձեռում է ոչ թե մենաշնորհը, այլ գիտատեխնիկական առաջընթացը: Նախկինում, այդ ծառայություններից օգտվելու համար քաղաքացիները ստիպված էին օգտվել անձնագրային բաժանմունքի տարածքից դուրս գտնվող մեկ կամ մի քանի տաղավարներից՝ վճարելով մի քանի անգամ ավել գումար և կորցնել ժամանակ:
Կուզեի կիսել իմ այն մտահոգությունը, որ մեզ հնչեցվող մեղադրանքների հիմքում ոչ թե ժողովրդի, այլ տնտեսվարողների սեփական շահերով մտահոգված լինելն է: Փորձ է արվում ժողովրդի բարեկեցությունը, ինչպես նաև լրատվամիջոցների թափանցիկ աշխատանքը շահարկելով, արդարացնել նշված ծառայությունների մատուցումը ՝ առավել բարձր գներով:
Արդյո՞ք խելամիտ է բողոքել գիտատեխնիկական առաջընթացի դեմ, երբ ներկայումս ամբողջ աշխարհում աշխատուժը փոխարինվում է առավել արդյունավետ և նվազ ծախսատար սարքավորումներով:
Կցանկանայի նաև նշել, որ իբրև թե մտահոգված լինելով ժողովրդի շահերով՝ մեղադրանքներ հնչեցնողները չեն քննարկում իրենց ծառայությունների գինը իջեցնելու որևէ տարբերակ: Մինչդեռ, նախքան մեր սարքերի հայտնվելը այդ տաղավարների ծառայությունները առանձնանում էին զգալի բարձր գներով, եթե համեմատենք այն տաղավարների հետ, որոնք նույն ծառայությունները մատուցում էին անձնագրային բաժանմունքների շրջակայքերից հեռու: Արդյո՞ք սա անբարեխղճության և անարդար մրցակցության դրսևորում չէ. բարձր գին սահմանել՝ օգտվելով իրենց տաղավարների հարմար տեղակայումից և այն հանգամանքից, որ քաղաքացուն պարզապես անհրաժեշտ են այդ ծառայությունները:
Կարծում եմ ավելորդ չէ նշել, որ անձնագրային տարածքային բաժանմունքներեը հանդիսանում են ՀՀ դեմքը եւ ինչու չէ նաեւ այցեքարտը։ Այնտեղ են մտնում հազարավոր քաղաքացիներ թե' Հայաստանում բնակվող, թե' արտերկրից ժամանած։ Եվ շատ կարեւոր է, որ նրանք այնտեղ տեսնեն ժամանակակից, մատչելի եւ հարմարավետ սարքավորումներ, որը առկա է նաեւ բոլոր զարգացած երկրներում։
Դիմում եմ ՀՀ բոլոր քաղաքացիներն և պատկան մարմիններին՝ չկորցնել զգոնությունը և օբյեկտիվորեն վերլուծել ստեղված իրավիճակը եւ առաջնորդվել բացառապես ժողովրդի շահերից։
Հարգանքներով, Ա. Թովմասյան, Գործադիր տնօրեն ՛՛Հուռնետ՛՛ ՍՊԸ»: