Վարչապետը խիզախ քայլեր է արել․ Մերկելը՝ Արցախյան հակամարտության կարգավորման գործընթացի մասին

Լավ է, երբ մարդիկ զրուցում են իրար հետ, սակայն երկու կողմերն էլ պատրաստ պետք է լինեն, որ խոսքերին հետևեն կոնկրետ գործողությունները։ Փաշինյան-Ալիև հանդիպումների և Արցախյան հակամարտության կարգավորման գործում դրանց դերի մասին հարցին այսօր Հայաստանի վարչապետ Նիկոլ Փաշինյանի հետ համատեղ ասուլիսի ժամանակ այսպես պատասխանեց Գերմանիայի կանցլեր Անգելա Մերկելը։

«Կարծում եմ, որ խիզախ քայլեր է ձեռնարկել պարոն վարչապետը»,- Փաշինյանին մատնանշելով՝ ասաց Մերկելը և նշեց, որ մյուս կողմն էլ պետք է նույնքան խիզախություն ցույց տա իր քայլերում։ Վերջին հաշվով, ըստ Մերկելի, երկու կողմերը պետք է համաձայնության հասնեն։

Նրա խոսքը շարունակեց վարչապետ Փաշինյանն ու բացատրեց, թե ինչ «խիզախ քայլերի» մասին է խոսքը։ Նա հիշեցրեց, որ ամիսներ առաջ ինքը Հայաստանի խորհրդարանում հայտարարել է, որ Արցախյան հակամարտության կարգավորման ցանկացած տարբերակ պետք է ընդունելի լինի Հայաստանի, Արցախի և Ադրբեջանի ժողովուրդների համար։

«Եվ ես հույս ունեի, որ այդ հայտարարությանը նմանատիպ հայտարարություն կհետևի նաև ադրբեջանական կողմից, բայց ցավոք սրտի, ադրբեջանական կողմից ոչ մի պաշտոնյա նույնիսկ կիսաձայն չի բարձրաձայնում, որ Ղարաբաղի հարցի որևէ լուծում կարող է ընդունելի լինել Հայաստանի ժողովրդի և Ղարաբաղի ժողովրդի համար։ Ես կարծում եմ, որ ահա այս մի հայտարարության պատմությունը հստակ ցույց է տալիս այն իրավիճակը, որ մենք ունենք բանակցային գործընթացում։ Եվ քանի դեռ համարժեք հայտարարություններ չեն հնչում նաև Ադրբեջանից, մենք շատ մեծ հույսեր ունենալ, որ կարող ենք առաջ շարժվել այս ուղղությամբ, ցավոք, չենք կարող»,- ասաց Փաշինյանը։

Վարչապետը հաստատեց, որ Հայաստանի Հանրապետությունը նվիրված է բանակցային գործընթացում հարցը բացառապես խաղաղ լուծելու ձևաչափին։ Փաշինյանը նշեց, որ քննարկումների ընթացքում հստակ արձանագրել է՝ ինքը կարող է բանակցել Հայաստանի անունից, բայց չի կարող բանակցել Լեռնային Ղարաբաղի անունից, քանի որ Արցախի ժողովուրդը չի մասնակցում ՀՀ ընտրություններին, քվե չի տվել Փաշինյանին և առհասարակ ունի սեփական ընտրված իշխանություններ։