Գյումրիում բացվել է մանրակերտների «Մինի» թանգարան (լուսանկարներ)
Ամեն ինչ իրական, բայց իրական չափերից տասնյակ անգամ փոքր… Այսպես կարելի է բնութագրել այն աշխատանքները, որոնց հեղինակը գյումրեցի Վալեր Նազարեթյանն է: Նրա հավաքածուում մի ամբողջ նվագախմբի մանրակերտ է: Երաժշտական տարբեր գործիքները, որոնք տեղավորվում են ափի մեջ, կարողանում են արտաբերել հնչյուններ: Մանրակերտ կրկնօրինակները իրական գործիքների պատճենն են: Հեղինակի ճշգրիտ կրկնօրինակելու ձիրքը շատերին է հետաքրքրել ու մանրակերտները տեսնելու ցանկություն առաջացրել: Ցուցանմուշները ներկայացված են Վալեր Նազարեթյանի նորաբաց «Մինի» թանգարանում:
Փոքրիկ է ոչ միայն ցուցադրությունների համար նախատեսված տարածքը, այլև
ցուցանմուշները: Դրանք հեշտությամբ տեղավորվում են ափի մեջ: Մի քանիսն էլ անզեն աչքով հազիվ են նշմարվում: Մինի թանգարանում ամենափոքր ցուցանմուշը դուդուկն է: Իրական չափերից մոտ 30 անգամ փոքր մանրակերտը ծիրանափողի ճիշտ պատճենն է: Դժվար է հավատալ, որ այս ամենի հիմնական հումքը թուղթն է:
Մինի նվագախմբում դաշնամուրն է, հարվածային գործիքները, կիթառը, ակորդեոնը և ստեղնաշարային գործիքները: Երաժշտական այլ գործիքներ կարելի է գտնել հեղինակի մյուս ստեղծագործություններում, որոնցում 1970-ականների կենցաղն է պատկերված:
Մեկ այլ նվագարկիչ էլ 90-ականներն արտացոլող աշխատանքի թեմա է դարձել: Հեղինակն իր հիշողությունները ցուցանմուշի է վերածել:
Թանգարանի ցուցանմուշները հիմա շատ չեն: Դրանց յուրաքանչյուրի ստեղծման
համար 6-8 ամիս է պահանջվել: Իսկ այցելուներ թանգարանն ունի Հայաստանի
մարզերից. պարբերաբար դպրոցականների խմբեր են այցելում, նաև նրանք, որոնց
հետաքրքրում է մանրակերտների արվեստը: Իսկ թանգարանը իր տեսակով եզակի է ոչ
միայն Հայաստանում, այլև տարածաշրջանում:
Վալեր Նազարեթյանի աշխատանքները ցուցադրվել են Երևանի տարբեր թանգարանների ցուցասրահներում: Հրավերներ հիմա էլ կան, բայց արդեն հեղինակը պատասխան հրավերով է հանդես գալիս ու առաջարկում ոչ թե իր աշխատանքները տանել այլ բնակավայրեր, այլ այցելուներին բերել Գյումրի: