Սահմանադրական կարգը տապալելու փորձ կատարվել է Լևոն Տեր-Պետրոսյանի և նրա շրջապատի կողմից. Ռուբեն Սահակյան (տեսանյութ)

2008թ. մարտի մեկի երեկոյան բանակին հանձնարարվել է պահպնել պետական կառավարական շենքերը, իսկ ցերեկը նրանք կանգնած են եղել և որեւէ գործողություն չեն արել: Այս մասին այսօր՝ հունվարի 29–ին, Վերաքննիչ քրեական դատարանում լրագրողների հետ զրույցում հայտարարեց Հայաստանի երկրորդ նախագահ Ռոբերտ Քոչարյանի պաշտպաններից Ռուբեն Սահակյանը, անդադառնալով պաշտպանության նախկին նախարար Սեյրան Օհանյանի նախօրեին արված այն հայտարարությանը, թե բանակը հետընտրական այդ գործընթացներին ներգրավվել է Հայաստանի նախագահի կողմից՝ պահպանելով բոլոր օրենսդրական կողմերը՝ արտակարգ դրություն մտցնելուց հետո։

Դիտարկմանը, թե կան կադրեր, որ Մարտի 1-ի առավոտյան ժամերին պաշտպանության նախարարության մեքենաները կանգնած էին, Սահակյանը նկատեց, որ մեքենաները պարզապես կանգնած են եղել:

Հարցին՝ ինչու՞ էին կանգնած, Սահակյանը պատասխանեց.

«Պատրաստվում էին, հնարավոր է կարող էին իրադարձությունները այնպես զարգանալ, տեսնո՞ւմ եք չէ... Կոչեր են եղել, թե ի՞նչ անենք, ի՞նչ չանենք, հետո երբ, ըստ էության խուզարկություն կատարվեց հրապարակում, դուք տեսաք, որ մարդիկ զինված էին փայտերով, ձողերով, մահակներով»։

Դիտարկմանը, թե այդ խուզարկության որոշումը ՀՔԾ-ն վիճարկում է, Սահակյանը նշեց, որ դա իրեն չի հետաքրքրում. «Ես Ռոբերտ Քոչարյանի շահերը ներկայացնող անձ եմ, ես գտնում եմ, որ այն մեղադրանքը, որ նրան առաջադրվել է, չէր կարող առաջադրվել, դա իրավական տգիտություն է, բոլոր նրանց կողմից ովքեր այդ բանը պաշտպանում են: Քոչարյանն անձեռնմխելի է, բոլոր նրանք ովքեր հակառակն են ասում, տգետ են, կամ իրենց առջեւ նպատակ են դրել անել այն, ինչ մինչ օրս արել են: Այսինքն՝ ապօրինի ձերբակալել, կալանավորել, մեղադրել հանրապետության երկրորդ նախագահին։ Ես այն կարծիքն եմ, որ Սահմանադրական կարգը տապալելու փորձ կատարվել է Լեւոն Տեր-Պետրոսյանի եւ նրա շրջապատի կողմից, բայց քանի որ փոփոխություն մտավ Քրեական օրենսգրքում նրանց մասով քրեական հետապնդումը դադարեցվեց: Փոփոխությունը մտավ 2009-ի մարտ ամսին եւ մարտի 31-ին Ալեքսանդր Արզումանյանի եւ եւս վեց անձի նկատմամբ քրեական հետպանդումը դադարեցվեց»,-ասաց Սահակյանը՝ բացատրելով, որ «Յոթի գործով» անցնող անձանց վերագրվող հոդվածը վերափոխվել եւ շարադրվել է նոր խմբագրմամբ՝ բաղկացած երկու մասից՝ իշխանությունը զավթելը եւ իշխանությունը պահելը:

«Թող այդ հոդվածով մեղադրանք առաջադրեն, ինչու՞ չեն մեղադրում այդ հոդվածով, չէ՞ որ Ռոբերտ Քոչարյանին մեղադրում են այն բանի մեջ, որ նա սահմանդարկան կարգն է տապալել՝ յուրացնելով իշխանությունը, մի՞թե մեր իրավագետները, քննիչները, դատախազները կարդալ չգիտեն. եթե գրված է որ նա մեղադրվում է իշխանությունը յուրացնելու միջոցով սահմանդական կարգը տապալելու համար, ապա ճիշտ 300-րդ հոդվածն է, ինչու՞ չեն դնում այդ հոդվածը»,–հայտարարեց փաստաբանը։

Հարցին, թե այն հանգամանքը, որ տանկերը քաղաքում են եղել Մարտի 1-ի առավոտյան, արդյոք չի նշանակում, որ բանակը արդեն իսկ ներգրավված է եղել, Սահակյանը պատասխանեց .«Չի նշանակում, քանի որ բանակը ոչին չի արել»:

Լրացնող հարցին, այդ դեպքում ինչու՞ է տեղակայվել, Սահակայնը պատասխանեց.

«Որովհետեւ երկու գեներալ փորձել են եւ նաեւ հատուկ գնդի 80 տոկոսը փորձել են գործողություններ կատարել, որոնց իրավունքն իրեն չեն ունեցել, քանի որ բանակն ապաքաղաքականացված է եւ բանակի ներգրավումը կարող էր կատարվել միայն եւ միայն հանրապետության նախագահի որոշամամբ՝ այն էլ ոչ թե, որպեսզի ճնշվեր ժողովրդի մի մասի ընդվզումը, այլ որպեսզի սահմանդրական կարգը պահպանվեր»,–ասաց նա և հավելեց. «Սահմանդրական կարգը պահպանվել է առանց նրանց միջամտության»։