Շատ եմ հուզվում, որ 20 տարի հետո գնահատել են իմ որդուն. ազատամարտիկը հետմահու պարգևատրվեց
ՀՀ նախագահի նստավայրում այսօր, հունվարի 28–ին, շարքային Արամ Ճաղարյանը մահից 20 տարի անց պարգևատրվեց Մարտական ծառայության մեդալով, որը ստացավ նա մայրը՝ Անահիտ Ճաղարյանը։ Տիկին Ճաղարյանն ասաց, որ որդին զոհվել է 1998 թ. մարտական հերթապահության ժամանակ, երբ շարժ է նկատել ականապատ տարածքում, առաջ է գնացել և պայթել ականի վրա։ Երեք ամիս հիվանդանոցում մնալուց հետո կոմայից դուրս չի եկել և մահացել է. «Ես շատ եմ հուզվում, որ 20 տարի հետո նրանք հետաքրքրվել ու գնահատել են իմ որդուն։ Շատ հպարտ եմ, որ էսպիսի կազմակերպված, էսպիսի հզոր բանակ ունենք, բայց շատ խոր ցավ եմ զգում, որ որդուս կորցրել եմ»։
Հերոսի մոր ցանկությունը մեկն է՝ խաղաղություն. «Թող աստված խաղաղություն անի, մեր հերոս երեխեքը իրենք ստանան իրենց պարգևները, առողջ վերադառնան, ոչ մի տան ճրագ չմարի»։
Այսօր պարգևի արժանացած ազատամարտիկ Անդրանիկ Մանուկյանն էլ նշեց, որ 90–ականներին մեկնեց Արցախ, որովհետև «պետք էր և վերջ», անգամ մտածելու ժամանակ չկար։ Այժմ՝ 27 տարի անց, ազատամարտիկը հպարտ է, որ բանակը հզոր է և կայացած, իսկ նոր սերունդը ավելի լավն է և որ ամենակարևորն է, ընկճվածություն չունի։
Այժմ նրա որդին է ծառայում առաջնագծում, ինչի համար ազատամարտիկը միայն
հպարտ է. «Իմ երեխան ծառայում է հայկական բանակում, ոնց հայրը, այնպես էլ
երեխաները պետք է լինեն։ Թող բոլորը վերադառնան իրենց մայրերին, իրենց
հարազատներին, իրենց օջախները»։
Հիշեցնենք, որ այսօր ՀՀ նախագահի հրամանագրերով ծառայության ընթացքում ցուցաբերած խիզախության և նվիրումի համար մի խումբ զինծառայողներ և ազատամարտիկներ պարգևատրվել են Հայաստանի Հանրապետության պետական բարձր պարգևներով: Նրանցից երեքը՝ ԶՈւ շարքային զինծառայողներ Մհեր Հովսեփյանը, Արամ Ճաղարյանը և սերժանտ Հայկ Քարամյանը, պարգևի են արժանացել հետմահու։