Այնպես չէ, որ մենք այսօր 100 տոկոսով ամեն ինչ անելու ենք, որ տարածքների որևէ խնդիր չլինի. Վիտալի Բալասանյան. (տեսանյութ)
Արցախի համար չի կարող ընդունելի լինեն կարգավիճակի դիմաց տարածքներ զիջելու տարբերակը:
Այս մասին, այսօր՝ հունվարի 28-ին, «Եռաբլուր» պանթեոնում լրագրողների հետ զրույցում նշեց Արցախի անվտանգության խորհրդի քարտուղար Վիտալի Բալասանյանը:
«Այնպես չէ, որ մենք այսօր խոսում ենք 100 տոկոսով ամեն ինչ անելու ենք, որ տարածքների որևէ խնդիր չլինի: Բանակցությունները ցույց կտան, Արցախյան կողմը և համայն հայությունը պատրաստ չէ տարածքային որևէ զիջման ինչ-որ բանի դիմաց: Մենք ժամանակին զիջումները արել ենք. 1988 թվականին, 1991 թվականին զիջումներ արել ենք, Հայաստանն է այդ զիջումները արել, երբ մենք միացյալ Հայաստան ունեինք և Արցախը անկախ հռչակվեց»,-հայտարարեց Բալասանյանը:
Նա հիշեցրեց, որ 1991-94 թվականների ՄԱԿ-ի ընդունած 4 բանաձևերը իրենք պաշտպանել, պահպանել ենք, զիջումները արել են. «Երբ Ադրբեջանում վիճակը ծանր էր, ՄԱԿ-ում բանաձև էին ընդունում, մենք ձեռնպահ էինք մնում հարձակողական գործողություններից: Թաքցնելու բան չկա: Իսկ Ադրբեջանը 1-2 ամիս իր զորքը վերադասավորում էր, զինտեխնիկան բերում էր և սկսում էր հարձակողական օպերացիաները: Մենք 4 անգամ զիջել ենք, 1994 թվականի մայիսի 12-ին զիջել ենք»,-հայտարարեց Վիտալի Բալասանյանը:
Հիշեցնենք, որ 1994 թվականի մայիսի 12-ին Ռուսաստանում կնքվել է հրադադարի փաստաթուղթը, որը ստորագրել են Հայաստանի, Արցախի և Ադրբեջանի պաշտպանության նախարարները: