Հայ քաղաքական գործիչը մահացել է 52-օրյա հացադուլից հետո. Washington Post-ը՝ Մհեր Եղիազարյանի մահվան մասին
Ամերիկյան Washington Post պարբերականն անդրադարձել է «Նուբարաշեն» քրեակատարողական հիմնարկում Մհեր Եղիազարյանի մահվան հանգամանքին, որը 52 օր հացադուլի մեջ էր եղել:
Պարբերականն ընդգծում է, որ 51-ամյա գործիչն անցյալ ամառ ստեղծված «Հայոց Արծիվներ. Միասնական Հայաստան» կուսակցության փոխնախագահն էր: Վերջինս ձերբակալվել էր դեկտեմբերի 4-ին՝ մինչև 10 000 դոլարի չափով գումար շորթելու, կաշառք տալու կասկածանքով: Նա հացադուլ էր հայտարարել դեկտեմբերի 5-ին:
Հիշեցնենք, որ Մհեր Եղիազարյանի մահվան մասին հայտնի էր դարձել շաբաթ՝ հունվարի 26-ին: Քրեակատարողական ծառայությունից հայտնել էին, որ ՀՀ ԱՆ «Նուբարաշեն» քրեակատարողական հիմնարկի կալանավորված անձ Մհեր Եղիազարյանի (ծնված 1968թ․, մեղադրվում էր ՀՀ քրեական օրենսգրքի 178 հ․ 2-րդ և 3-րդ մասերով, 38-34-312 հ․ 2-րդ և 3-րդ մասերով) ինքնազգացողության կտրուկ վատթարացման կապակցությամբ հրավիրվել էր շտապօգնություն, որի կողմից ժամը 06։35-ի սահմաններում արձանագրվել էր կալանավորված անձի կենսաբանական մահը։