2019թ. գազի սակագինը չի փոխվի. Փաշինյանի մամուլի ասուլիսը Մոսկվայում
Հայաստանի Հանրապետության վարչապետ Նիկոլ Փաշինյանը Մոսկվայում Եվրասիական տնտեսական հանձնաժողովի նիստում ելույթ ունենալուց հետո այժմ մասնակցում է տարբեր լրատվամիջոցների ներկայացուցիչների հետ մամուլիսի ասուլիսին:
Հայաստանում գազի սակագնի բարձրացման հավանականության վերաբերյալ հարցին ի պատասխան վարչապետն ասել է, որ 2019թ. Հայաստանում թանկացում չի լինի:
«Համենայն դեպս, մենք մեկ տարի ունենք «Գազպրոմ»-ի հետ բանակցությունները շարունակելու համար»,-ասել է Փաշինյանը:
Նա հավելել է, որ Հայաստանը մեկ տարի ունի գազի ներքին սակագնի հարցը քննարկելու համար: Փաշինյանն ընդգծել է, որ Հայաստանի համար կարևոր է այս հարցին երկարաժամկետ լուծում տալը:
«Ավելի լավ կլինի, եթե այն լուծվի ԵԱՏՄ շրջանակում»,-ասել է նա:
Ավելի վաղ Փաշինյանը «ՌԻԱ Նովոստի» գործակալության հետ զրույցում հայտնել էր, որ երկրի իշխանությունները «Գազպրոմ» ընկերության հետ պայմանավորվել են գազի ներքին սակագնի պահպանման մասին:
«Գազպրոմ»-ը գազը վաճառում է ոչ թե Հայաստանին, այլ «Գազպրոմ Արմենիա»-ին, այդ պատճառով մեր դերը միջնորդավորված է: Բայց մենք պայմանավորվել ենք «Գազպրոմ Արմենիա»-ի հետ, որ երկրի ներսում գազի գինը չի փոխվի»,-ասել էր Նիկոլ Փաշինյանը Դավոսում:
Նա հավելել էր, որ հայկական կողմը վերջնական համաձայնության գալու նպատակով շարունակելու է «Գազպրոմ»-ի հետ բանակցությունները:
«Մեզ համար շատ կարևոր է գազի գնի երկարաժամկետ համաձայնեցումը: Ներկայում Եվրասիական տնտեսական միության շրջանակում ընթանում է գազի և էներգետիկայի ընդհանուր շուկաների ստեղծման հարցի քննարկումը, ինչը նշանակում է, որ մենք խոսելու շատ բան ունենք»,-ասել է Փաշինյանը:
Հիշեցնենք, որ «Գազպրոմ»-ը հաղորդել էր, որ գազի սակագինը Հայաստանի համար թանկանալու է 10 տոկոսով. գործող 150 դոլարի փոխարեն կլինի 165 դոլար 1000 խմ համար։ ՀՀ վարչապետն ավելի վաղ ասել էր, որ գազի գնի որոշակի բարձրացում է տեղի ունենալու, բայց ներքին կարգավորումների շնորհիվ հայաստանյան սպառողների համար գազի գնի փոփոխություն տեղի չի ունենա: