Տիմոշենկոն հայտարարել է Ուկրաինայի նախագահական ընտրություններում առաջադրվելու մտադրության մասին

Ուկրաինական ընդդիմադիր «Բատկիվշչինա» (Батькивщина) խմբակցության նախագահ Յուլյա Տիմոշենկոն հայտարարել է, որ նախատեսում է առաջադրվել Ուկրաինայում կայանալիք նախագահական ընտրություններին ու առաջ քաշել «Նոր տնտեսական ուղղություն» ծրագիրը: Այս մասին հայտնում է Настоящая время-ն:

Աղբյուրը հայտնում է, որ Ուկրաինայի միջազգային անկախ ինստիտուտի կողմից կատարված սոցիալական հարցման արդյունքում պարզվել է, որ Տիմոշենկոն այժմ ամենաբարձր վարկանիշն ունի՝ նախագահի մյուս թեկնածուների համեմատ:

Տիմոշենկոն ծնվել է Դնեպրոպետրովսկում: Ավարտել է տեղի պետական հանքաարդյունաբերական ինստիտուտը: Ուկրաինայի Գերագույն ռադայում որպես պատգամավոր առաջին անգամ ընտրվել է դեռևս 1997 թվականին: 1999 թվականին նշանակվել է Ուկրաինայի՝ նավթաէներգետիկ հարցերի գծով փոխվարչապետ: 2005 թվականին դարձել է այդ երկրի վարչապետ, ընդ որում, ԱՊՀ տարածքում այդ պաշտոնը ստացած առաջին կին պաշտոնյան է:

2004 թվականին Վիկտոր Յուշչենկոյի հետ կազմակերպել ու իրականացրել է Ուկրաինայի «Նարնջագույն հեղափոխությունը»: Վիկտոր Յանուկովիչի՝ իշխանության գալուց հետո 7 տարվա ազատազրկման է դատապարտվել պաշտոնեական դիրքի չարաշահման համար: 2014 թվականի իշխանափոխությունից հետո ազատ է արձակվել:

Հիշեցնենք, որ Ուկրաինայում նախագահական ընտրությունները կայանալու են 2019 թվականի մարտի 31-ին: Ընտրությունների արդյունքները կհրապարակվեն մինչև ապրիլի 10-ը: