Արսեն Թորոսյանը ներկայացրել է բժշկական ապահովագրության հետ կապված կառավարության մոտեցման մոդելը (տեսանյութ)
ՀՀ առողջապահության նախարար Արսեն Թորոսյանը ֆեյսբուքյան ուղիղ եթերի ընթացքում ներկայացրել է կառավարության մոտեցումը բժշկական ապահովագրության հարցում.
«ԲԺշկական ապահովագրության նպատակներն են օգնության սպասարկման որակի բարձրացումը, նոր մեխանիզմների ներդրումը: Սկզբունքներից են առողջապահության ոլորտում համերաշխության և արդարության ձևավորումը, բնակչության տարբեր խմբերի ռիսկերի համախմբումը, մատուցվող ծառայությունների փաթեթների միասնականացումը»:
Արսեն Թորոսյանը նշել է, որ նախարաությունը ցանկանում է լուծել բոլորի խնդիրները: Նախարարը նշել է, որ պետք է ունենալ ոչ թե հատվածական, այլ համապարփակ փաթեթներ:
«Լինելու են քաղաքացիներ, որոնց համար վճարելու է պետությունը, ոմանց համար՝ գործատուն: Բնակչության ընդգրկման ծածկույթի ապահովման համար կպահանջվի որոշակի ժամանակ: Նախատեսվում է ի սկզբանե ընդգրկել պաշտոնապես գրանցված աշխատողներին, ապա բնակչության այն խմբերին, որոնք օգտվում են պետպատվերի ծառայություններից: Հետագա փուլերում արդեն կքննարկվեն այլ քաղաքացիական խմբերը»:
Նախարարը նշել է, որ պետք է լուծվի նաև պաշտոնապես գրանցված գործազուրկների, ուսանողների, թոշակառուների հարցը:
Արսեն Թորոսյանի խոսքով՝ քննարկման ընթացքում կարող է ստացվել այնպես, որ մի մասը վճարի պետությունը, իսկ մի մասը՝ քաղաքացին: Նա նշել է, որ բուժօգնության ծավալները բոլոր խմբերի համար պետք է մեծացվեն:
«Հիմա մոտ 115 հազար քաղաքացի ունի սոցիալական փաթեթի բուժօգնության հատվածը: Ապահովագրավճարների հավաքագրումը պետք է լինի առկա մեխանիզմներով: Մենք կարծում ենք, որ իրականացնող կառույցը պետք է լինի մեկ հանրային մարմին: Դա ավելի արդյունավետ է, քան բազմակի մարմիններ ունենալը: Մասնավոր ապահովագրականների դեպքում պետք է շատ ծանր և խիստ ռեգուլյացիաների ենթարկել նրանց»,- ասաց նախարարը:
Նա նշեց, որ ֆոնդի կառավարումը պետք է անկախ լինի Առողջապահության նախարարությունից և հաշվետու լինի կառավարությանը:
Արսեն Թորոսյանի խոսքով՝ պետք է ստեղծվի կառավարման խորհուրդ, որում կլինեն ՀԿ-ներ, փորձագետներ: