Որևէ մեկը թող չմտածի, որ Արցախն իր գրպանում է, կարող է հանի, բլիթից մի մասը պոկի և ուրիշին տա. Թևան Պողոսյան

Տարածքների հանձնումը ուղղակի խոսքերի մեջ է և իրականության հետ կապ չունի: Այս մասին նշեց «Մարդկային զարգացման  միջազգային կենտրոնի» ղեկավար
Թևան Պողոսյանը՝ անդրադառնալով նրան, որ տարածքների հանձնման մոտեցումը
մշտապես եղել է բանակցությունների սեղանին դրված տարբերակների հիմքում:

«Որևէ մեկը թող չմտածի, որ Ղարաբաղը իր գրպանում է, որ կարող էգրպանից հանի, այդ բլիթից մի մասը պոկի և ուրիշին տա: Տարածքների հանձնում չի լինելու, որովհետև Արցախն ինքն է իր ճակատագիրը որոշելու և ողջ հայությունը պարտավոր է Արցախին նեցուկ կանգնել: Այնպես որ այդ խնդրի մասին խոսելը ավելի շատ նման է ինքներս մեզ ցավ պատճառելուն:

Եթե մի բան գիտենք, որ պատրաստ ենք չանելու, ինչո՞ւ ենք դրա մասին ընդհանրապես խոսում: Այլ խնդիր է, որ պետք է գիտակցենք, թե դա չանելու համար ինչ է պետք անել»,-ասաց նա:

Թևան Պողոսյանը նկատեց, որ եթե նույնիսկ դիվանագետները խոսում են դրա մասին, մենք պետք է հասկանանք, որ շատ բաներ ունենք կատարելու տանը՝ տնտեսության զարգացում, պետական ինստիտուտների հզորացում, ռազմարդյունաբերության ոլորտի զարկ տալը, բանակի հզորացում, գիտական ներուժի ավելացում:

«Եթե մենք այս ամենն անում ենք, որևէ մեկը, որքան էլ փորձի սցենարներ գրել, ինչ էլ երազի, որևէ բան չի կարող անել: Կլինի այն, ինչ մենք ենք երազում: Եկեք մենք մեր երազը կյանքի կոչենք, իսկ թե իր հայտարարություններով Մինսկի խումբը փորձում է նոր այս իրավիճակն օգտագործելով ասել, թե նոր պրոցես է, դրական բան կլինի, եկեք դրա մասին մոռանանք, որովհետև ամեն օր սցենարը կարող է փոխվել»:

Թևան Պողոսյանը համոզմունք հայտնեց, որ ամեն ինչ մեր ձեռքում է, հողն էլ մեր ոտքերի տակ է. «Եթե մեր ոտքի տակի հողը չենք պահելու, որևէ մեկին պետք չի մեղադրել: Իսկ եթե պահելու ենք, եկեք նման խոսակցություններին հանգիստ վերաբերվենք: Որևէ մեկը չի պատրաստում հողային խնդրի հաշվին հարցեր լուծել, իսկ եթե փորձի, դա նրան չի հաջողվելու:

Նաև գիտեմ, որ 1994-95 թվականներից ի վեր չկա այն մարդը, որը կգնա ու էդ տեսակի հրամանը կտա»,-ընդգծեց նա: