Հայաստանում 250 մլն դոլար ներդրումով կկառուցվի նոր հզորությամբ էլեկտրակայան. այն պատրաստ կլինի 26 ամսից

Կառավարությունն իր այսօրվա՝ հունվարի 17-ի որոշմամբ հավանություն տվեց ՀՀ Կառավարության, Արմփաուեր ՓԲԸ-ի և Ռենկո Ս․Պ․Ա-ի միջև կնքված Շրջանակային Համաձայնագրին:

Հարցը ներկայացրեց արդարադատության նախարարի պաշտոնակատար Արտակ Զեյնալյանը, ով նշեց, որ այս որոշման անհրաժեշտությունը պայմանավորված է ծրագրի ֆինանսավորումը կառուցապատողին հասանելի դառնալու համար, հետևաբար ծրագրի փաստացի գործընթացն սկսելու հրատապությամբ:

Նշվում է, որ 2015թ. դեկտեմբերի 2-ին ՀՀ Կառավարության և Renco SpA ընկերության միջև կնքվել է Փոխըմբռնման Հուշագիր Երևան քաղաքի տարածքում՝ «Երևանի ՋԷԿ» ՓԲԸ ի գործող ՋԷԿ-ի հարևանությամբ, գազային վառելիքով աշխատող կոմբինացված ցիկլով 250ՄՎտ հզորությամբ նոր էլեկտրակայան կառուցելու և շահագործելու վերաբերյալ:

Հիմք ընդունելով նշված Հուշագիրը՝ 2017թ. ապրիլի 27-ին ՀՀ Կառավարության, Renco SpA-ի և Արմփաուեր ՓԲԸ-ի («Կառուցապատող») կնքվել է Ծրագրի վերաբերյալ Շրջանակային Համաձայնագիր:

Զեյնալյանի խոսքով, այս պայմանագիրը ստորագրվելուց հետո ֆինանսավորումը հասանելի կդառնա կառուցապատողին և այն կսկսի 250 մգվ հզորությամբ ՋԷԿ-ի շինարարությունը:

Իր հերթին էներգետիկ ենթակառուցվածքների, բնական պաշարների նախարարի պաշտոնակատար գարեգին Բաղրամյանը նշեց, որ այս պայմանագրով Հայաստանի շահերը պաշտպանված են.

«Տարեկան մինչև 6,4 մլն դոլարի խնայողություն ունեցանք մեր էներգետիկ համակարգի համար:Եթե նայենք 20-25 տարվա կտրվածքով, շուրջ 160 մլն դոլար պետությունը կշահի: Ընկերությունն արդեն համապատասխան ֆինանսական երաշխիքներ է ներկայացրել բանկին և դիմել է կառուցման և արտադրության լիցենզիա ստանալու համար Հանրային ծառայությունները կարգավորող հանձնաժողովին»,-ասաց նա՝ հավելելով, որ աշխատանքներն սկսելուն պես կստեղծվի շուրջ 1200 աշխատատեղ:

Նախարարի պաշտոնակատարի խոսքով, երբ կայանը պատրաստ լինի ևս 230-250 աշխատատեղ կստեղծվի շատ բարձր աշխատավարձով:

Նշենք, որ Ծրագրի իրականացման վրա կներդրվի 250 մլն դոլար։ Շինարարությունը կտևի մոտ 26 ամիս, որում կներգրավվի 1000-1200 մարդ։ Կայանի շահագործման ժամանակ կստեղծվի մոտ 200-230 բարձր վարձատրությամբ աշխատատեղ, որոնցից 50-70 արդեն Կայանի շինարարության ընթացքում կգործուղվեն Գերմանիա՝ Siеmens ընկերությունում համապատասխան վերապատրաստում անցնելու և որակավորում ստանալու համար։