Եթե քվեարկենք «Լուսավոր Հայաստանի» թեկնածուի օգտին, կստացվի սիրելի ընդդմություն ենք ձևավորում․ Արարատ Միրզոյան

«Իմ քայլը» դաշինքը ԱԺ փոխխոսնակի պաշտոնում կքվեարկի ԲՀԿ-ի թեկնածուի օգտին։

Այս մասին լրագրողների հետ զրույցում ասաց ԱԺ նորընտիր նախագահ Արարատ Միրզոյանը։

«Ես կարծում եմ, որ տեղի են ունեցել ընտրություններ և ժողովուրդն ինքը ձևավորել է քաղաքական ուժերն այն համամասնությամբ, որը որ կա և Էդմոն Մարուքյանը նախընտրական քարոզարշավի ժամանակ ասում էր, որ այս ընտրությունները ձևավորում են ոչ այնքան իշխանություն, որքան ընդդիմություն։

Մասնակիորեն համաձայնելով այս պնդման հետ պետք է արձանագրենք, որ ժողովուրդն ընտրել է ընդդիմություն և հենց այն համամասնությամբ, որը կա։ Տարբերությունը շատ մեծ չէ, բայց մանդատը քիչ չէ։ Մենք կարծում ենք, որ մենք իրավունք չունենք ժողովրդի քվեով ձևավորված համամասնությունը խախտել։

Մենք հաշվի ենք նստում սրա հետ, մենք հարգում ենք ժողովրդի կատարած քվեարկությունը եւ մեծությամբ երկրորդ խմբակցությանը եւ ամենամեծ ըդդիմադիր ֆրակցիայի թեկնածուի օգտին կողմ կքվեարկենք։ սա կարծում եմ՝ մեր չեզոք դերակատարումն է, զուտ հաշվի առնելով մարդկանց արդեն իսկ կատարված ընտրությունը։

Հակառակ դեպքում կարող է այնպես ստացվել, որ «Իմ քայլը» դաշինքը ձևավորում է սիրելի ընդդիմություն, կամ ինչպես նախկինում էին ասում, մի քիչ այս բառը, վիրավորական, հարմար չեմ գտնում, գրպանային ընդդիմություն։ Մենք մեզ նման իրավունք որևէ կերպ չենք վերապահում»,-ասաց Միրզոյանը։

Լրագրողի հակադարձմանը, թե սրանով «Իմ քայլը» դաշինքը ցույց չի տա արդյոք, որ իր համար ավելի ընդունելի ընդդիմություն է ԲՀԿ-ն, Արարատ Միրզոյանն ասաց, որ ոչ․ «Մեզ համար ընդունելի տարբերակն այն է, ինչն արդեն ընտրել է ժողովուրդը»։

Նշենք, որ մինչ այս եղել են առաջարկներ, որ «Իմ քայլը» խմբակցությունն ազատ թողնի քվեարկությունը, սակայն այդ մոտեցումը չի ընդունվել: