Իսրայելը հարձակումներ է գործել Սիրիայում տեղակայված իրանական թիրախների վրա

«Վերջին 36 ժամվա ընթացքում Իսրայելի ռազմաօդային ուժերը հարվածներ են հասցրել թիրախներին՝ Դամասկոսի միջազգային օդանավակայանում տեղակայված իրանական պահեստներին, որոնք լցված են իրանական զենքով», – այս մասին այսօր Իսրայելի կառավարության նիստից առաջ հայտարարել է երկրի վարչապետ Բենյամին Նեթանյահուն։

Նա հայտարարել է, որ այդ հարձակումները ցույց են տալիս Իրանի և Սիրիայի դեմ գործելու իրենց վճռականությունը, որն առավել, քան երբևէ սաստիկ է։ Այս հարձակումների մասին տեղեկությունները մինչ այս հայտնել էր նաև սիրիական կողմը՝ հայտնելով, որ իսրայելական կողմը հարվածներ է հասցրել իրանական այն պահեստներին, որոնցից օգտվում էր «Հըզբոլլահը»։

Վարչապետը նշել է, որ իրենք տարիների ընթացքում հաջողությամբ արգելափակել են Սիրիայում իրանական ռազմական ենթակառուցվածքների ստեղծումը, ինչի նպատակով իրենց Պաշտպանության բանակը հարյուրավոր հարձակումներ է իրականացրել Իրանի զինված ուժերի և լիբանանյան «Հըզբոլլահ» շարժման դեմ։

Իսրայելի վարչապետը հաստատել է նաև այն տեղեկությունները, որ իրենք այս գիշեր Գազայի հատվածում ոչնչացրել են «ՀԱՄԱՍ»-ի ստորգետնյա երկու թունել, իսկ Լիբանանի հետ սահմանին հայտնաբերել են «Հըզբոլլահին» պատկանող 6-րդ ստորգետնյա թունելը, որը ձգվում էր դեպի Իսրայել։ Այսքանով, ըստ Նեթանյահուի, ավարտվել է երկրի զինված ուժերի այն գործողությունը, որն ուղղված էր թունելների ու ստորգետնյա ենթակառուցվածքների հայտնաբերմանն ու ոչնչացմանը: