ՊԵԿ նախագահը վստահեցնում է՝ կոշտ պայքար է մղելու նաև թուրքական լոլիկի ներմուծումը կարգավորելու հարցում

Տեղացի ֆերմերները շարունակում են դժգոհել, որ իրենց արտադրած լոլիկը չեն կարողանում սպառել, քանի որ թուրքականն է մեծ քանակությամբ ներկրվում: Իսկ թուրքականի պարագայում, քանի որ մշակման համար անհրաժեշտ ծախսերը քիչ են, գինը, բնականաբար, շատ ավելի ցածր է:

Ֆերմերները պահանջում են քայլեր ձեռնարկել խնդիրը կարգավորելու ուղղությամբ:

ՊԵԿ նախագահ Դավիթ Անանյանը հայտնել է, թե ինչ միջոցներ են ձեռնարկվում սահմանին թուրքական լոլիկի մուտքի խմբաքանակը կարգավորելու ուղղությամբ: Խնդիրը ծագել է այն պատճառով, որ ՊԵԿ-ն իրավունք չի ունեցել մաքսային հսկողություն իրականացնել ներմուծվող՝ մինչև 50 կգ բեռի նկատմամբ.

«Թե որքան է ներկրվել, թվեր չեմ կարող ներկայացնել մի պարզ պատճառով՝ 2018 թվականի ամռանը կատարված նորամուծությամբ՝ 50 կգ-ի գաղափարը մտցրեցին, էդ 50 կիլոներով մաքսանենգ ճանապարհով նաև լոլիկ է ներմուծվել Հայաստան: Տեղեկատվություն չունենալու պատճառն այն է, որ դրանք մաքսային ձևակերպում չեն ստացել»,- ասել է Դավիթ Անանյանը::

Ըստ ՊԵԿ նախագահի՝ Հայաստան-Վրաստան սահմանի չեզոք գոտում բեռները դատարկվել են և ներկրվել Հայաստան 50 կգ-ներով:

«Մենք չեն կարողացել որևէ հսկողական գործառույթ անել զուտ այն պատճառով, որ մեր՝ նույնիսկ ծառայություն կատարողների առօրյա աշխատանքային գործունեությունը վտանգի տակ է դրվել այդ քաղաքացիների պատճառով: Հիմա մենք, ելնելով այն հանգամանքից, որ ԵԱՏՄ-ում կանոններ են փոխվել, և առավելագույն չափը սահմանվել է 25 կգ, առավելագույն արժեքային չափը 500 եվրո, կառավարությունում քննարկել ենք, մի քանի որոշումներ ենք կայացնելու, այդ թվում ռիսկի պրոֆիլի խմբագրման հետ կապված, և շատ կոշտ պայքար են մղելու: Այո՛, շատ կոշտ պայքար ենք մղելու: Կառավարության որոշմամբ այդ առավելագույն չափերը սահմանելուց մենք ցանկություն ունեինք, որ մեր ազգաբնակչությունն իր կենցաղային կարիքները հոգալու համար ավելի մեծ քանակությամբ կարողանա ուղեկցող բեռ բերել Հայաստան, բայց մենք չէինք պատկերացնում, որ մեր ազգաբնակչությունը դա սովորական բիզնեսի կվերածի», – հավելել է Անանյանը:

ՊԵԿ նախագահը նաև նշել է, որ նշված փոփոխություններով հնարավոր կլինի վերահսկելի դարձնել լոլիկի՝ էական քանակության մուտքը Հայաստան, որը խոչընդոտներ է ստեղծում տեղական արտադրության իրացման համար: