The Guardian-ի անդրադարձը՝ Հայաստանում ինովացիոն ակտիվության մասին

Հետխորհրդային տարածաշրջանում ինովացիոն ակտիվության ալիք է բարձրանում։ Սկսած Ռուսաստանից՝ մինչև Հայաստան և Բելառուս տեղի է ունեցել արդարության համար ինտերնետ-քարոզչությունների բռնկում։ Այս մասին բրիտանական The Guardian-ում հրապարակած իր հոդվածում գրում է վերլուծաբան և գրող Բարբարա Ֆոն Օֆրեյթագը։

Նրա խոսքերով՝ Հայաստանում քաղաքացիական հասարակության երիտասարդ ակտիվիստների լավատեսությունն ու էներգիան վարակիչ է։ «Բոլոր նրանք, ովքեր կարծում են, թե հետխորհրդային դարաշրջանում ամեն ինչ դատապարտված և մռայլ է, պետք է այցելեն Հայաստան»,- գրում է հեղինակը։

Նա նշում է, որ անցյալ տարի երիտասարդ ակտիվիստ-տեխնիկները կարևոր դեր են կատարել ցույցերի ժամանակ, որոնք հանգեցրել են քաղաքացիների համընդհանուր մոբիլիզացիայի։ «Շփվելու նրանց կարողության շնորհիվ բողոքները խաղաղ բնույթ են կրել»,- գրում է հեղինակը։

Ընդհանրապես, ըստ վերլուծաբանի, այն, ինչը հուսադրում է Z սերնդի ակտիվիստների մեջ, այն է, որ նրանք գրավում են դիզայներներին, տեխնիկական փորձագետներին և նկարիչներին, որպեսզի թեսթավորեն աջակցության և քարոզչության անցկացման նոր ձեւեր։ Սա հանգեցրել է ցանցային մուլտիմեդիական ընկերությունների և սոցիալական հարցերով ինտերակտիվ խաղերի ստեղծմանը։ Դրանցից որոշները չաթ-բոտեր են օգտագործում մարդու իրավունքների խախտումներից տուժածների ակնթարթային աջակցության համար։