Ղազախստանում սպանության գործով միջազգային հետախուզման մեջ գտնվող հայազգի կասկածյալը փախել է Ռուսաստան
Ամանորի գիշերը Կարագանդայում կատարված սպանության գործով միջազգային հետախուզման մեջ գտնվող հայազգի կասկածյալ Նարեկ Գուրուրյանը կոնֆլիկտից հետո փախել է Ռուսաստան, գրում է nur.kz-ն՝ Ղազախստանի ներքին գործերի նախարարությանը հղումով:
Նշվում է, որ կասկածյալը ռուս-ղազախական սահմանը հատել է Պավլոդարի նահանգում: Սահմանի հատումը տեղի է ունեցել հունվարի 1-ին՝ երեկոյան 22:00-ից հետո:
Աղբյուրը մանրամասնում է, որ հետախուզման գործի շրջանակում Ռուսաստան և Հայաստան են ուղարկվել օպերատիվ-քննչական խմբեր:
Երկրի ներքին գործերի նախարարության պաշտոնական ներկայացուցիչ Ալմաս Սադուբաևը տեղեկացրել է, որ Գուրուրյանը ՀՀ քաղաքացի է:
«Քանի որ ներկայում քննություն է ընթանում, մենք չենք կարող այլ տեղեկություն գաղտնազերծել»,-հավելել է նա:
Դատարանի վճռի համաձայն՝ ծեծկռտուքի 14 մասնակիցներից 9-ը պետք է կալանավորվեն. ներկայում մեկուսարանում է գտնվում ութ մարդ, մինչդեռ 9-րդը՝ Գուրուրյանը, հետախուզման մեջ է:
Ավելի վաղ Ղազախստանի ներքին գործերի նախարարությունը մեկնաբանել էր նախօրեին տարածված տեսաուղերձը, որը հղել էր Գուրուրյանը՝ հայտարարելով, որ ինքը մարդասպան չէ ու պատրաստ է հանձնվել ղազախական իշխանություններին:
«Հետախուզման գործի շրջանակում ոստիկանները ստուգել են նրա հնարավոր գտնվելու վայրերը: Համացանցում նրա տեսաուղերձի հայտնվելուց ու իրավապահներին հանձնվելու պատրաստակամություն հայտնելուց հետո կասկածյալի հարազատներին են փոխանցվել մեր աշխատակիցների կոնտակտները: Սակայն առ այսօր որևէ մեկը կապի դուրս չի եկել»,-նշել էր Սադուբաևը:
Նա հավելել էր, որ ՆԳՆ-ն երաշխավորում է գործի օբյեկտիվ, համապարփակ հետաքննությունն ու քաղաքացի Գուրուրյանին խորհուրդ է տալիս ինքնակամ հանձնվել իրավապահներին:
Հիշեցնենք, որ ոչ սթափ վիճակում գտնվող տղամարդկանց խումբն Ամանորի գիշերը ծեծկռտուք է սարքել ռեստորանի մոտ, ինչի հետևանքով մեկ զոհ է գրանցվել:
Կարագանդայի նահանգապետ Երլան Կոշանովը ոստիկանության շենքի մոտ հավաքված 200-ից ավելի մարդու հետ հանդիպմանը հայտարարել էր, որ հունվարի մեկին «Հին Հռոմ» ռեստորանի մոտ հայերի մասնակցությամբ տեղի ունեցած զանգվածային ծեծկռտուքի բոլոր մեղավորները կպատժվեն:
Նահանգապետը նաև մանրամասնել էր, որ դեպքի առնչությամբ սկսված հետաքննության ընթացքին անձամբ հետևում է Ղազախստանի գլխավոր դատախազը:
Նահանգապետարանից ընդգծել են, որ ծեծկռտուքը տեղի է ունեցել մարդկանց երկու խմբի միջև ու ազգամիջյան բնույթ չի կրել:
Ավելի վաղ Կարագանդայի շրջանային դատարանը Սոխակ Մալխասյանի, Թորգոմ Մալխասյանի և Կաիր Նադիրբեկովի նկատմամբ որպես խափանման միջոց էր ընտրել կալանքը:
Բացի այդ, ղազախական «ԲԱՍԵ» հեռուստաալիքը, անդրադառնալով դեպքին, բացահայտել է, որ կասկածյալների ինքնությունը հունվարի 2-ին և մեկ օր անց արմատապես տարբերվել է: Մասնավորապես՝ հունվարի 2-ին նշվել են ադրբեջանցիների անուն-ազգանուններ, մինչդեռ հաջորդ օրը ենթադրյալ հանցագործների անուն-ազգանունները դարձել են հայկական