Ինչու են ազատավանցի տարեց ամուսինները թունաքիմիկատ խմել․ պարզաբանում է գյուղապետը

Արարատի մարզի Ազատավան համայնքում գյուղատնտեսական թունաքիմիկատից թունավորված տարեց ամուսինների կյանքին վտանգ չի սպառնում, նրանք երկուշաբթի դուրս կգրվեն «Արմենիա» ԲԿ–ից։ Այս մասին ասաց Ազատավանի համայնքապետ Պետիկ Ղազարյանը՝ նշելով, որ ինքն անհավանական է համարում ինքնասպանության վարկածը։

«Ամուսինները իրենց որդու ընտանիքի հետ են ապրում, շատ սիրով, հարգված ընտանիք են, խնդիրներ չունեն, նորմալ ապրող ընտանիք են։ Ամուսինները կամ շփոթվել են՝ թունաքիմիկատ են խմել, կամ էլ ծերունական խնդիր է՝ հիշողության հետ կապված»,– ասաց գյուղապետը։

Նա հավելեց, որ տարեց ամուսինների որդին տարիներ առաջ գյուղատնտեսական թունաքիմիկատների առուվաճառքով է զբաղվել, և տանը թունաքիմիկատներ եղել են։

Ավելի վաղ հայտնել էինք, որ հունվարի 4-ին ժամը 15:20-ի սահմաններում Արտաշատի բժշկական կենտրոնից ոստիկանության Արտաշատի բաժին ահազանգ է ստացվել, որ «սուր էկզոգեն թունավորում գյուղատնտեսական թունաքիմիկատով» ախտորոշմամբ իրենց մոտ են տեղափոխվել 2 քաղաքացի:

Ոստիկանները պարզել են, որ նրանք են՝ Արարատի մարզի Ազատավան գյուղի բնակիչներ, 88-ամյա Ռաֆիկ Մաթևոսյանը և 79-ամյա Օֆիկ Մաթևոսյանը:

Ըստ նախնական տեղեկությունների՝ պարզվել է, որ Ռ. և Օ. Մաթևոսյանները նույն օրը, ժամը 10:00-ի սահմաններում իրենց տանը ինքնասպանություն գործելու նպատակով խմել են «Ագրոֆոս Սուպեր» տեսակի գյուղատնտեսական թունաքիմիկատ: Հիվանդանոցում բժիշկները ոստիկաններին հայտնել են, որ նրանք ի վիճակի չեն կատարվածի մասին բացատրություն տալու:

Փաստի առթիվ ոստիկանության Արտաշատի բաժնի հետաքննչական բաժանմունքում նյութեր են նախապատրաստվում: