Այս ծառայությունը շատ էական նշանակություն ունի և՛ մեր լավ, և՛ դժվարին օրերի համար. Արմեն Սարգսյանը ԱԻՆ-ում
Նախագահ Արմեն Սարգսյանն այսօր այցելել է Արտակարգ իրավիճակների նախարարություն, որտեղ նրան ներկայացրել են նախարարության առանձին կառուցվածքների աշխատանքը:
«Աշխարհի լավագույն օրերին էլ միշտ կա Աստծո գործոնը, միշտ կան անսպասելի երևույթներ, միշտ կան իրավիճակներ, որոնք չես կարող կանխորոշել, և դա նշանակում է, որ կան մարդիկ՝ օրը 24 ժամ, տարվա բոլոր օրերին պետք է պատրաստ լինեն, ներառյալ՝ Նոր տարուն: Եվ չգիտես ինչու մեր կյանքում դժվարությունները հայտնվում են այն պահին, երբ ամենաքիչն ես սպասում: Հետևաբար՝ այս ծառայությունը շատ էական նշանակություն ունի և՛ մեր լավ, և՛ դժվարին օրերի համար», – ասել է նախագահը:
Արտակարգ իրավիճակների նախարարի պաշտոնակատար Ֆելիքս Ցոլակյանի ուղեկցությամբ նախագահը նախ այցելել է ԱԻՆ Ճգնաժամային կառավարման ազգային կենտրոն: Վթարներ, արտակարգ դեպքեր, տարերային աղետներ, բոլոր այդ տվյալներն ամեն վայրկյան ու րոպե Ճգնաժամային կառավարման ազգային կենտրոն է հասնում:
Աշխատակիցներն ասում են՝ ահազանգերի պակաս երբեք չկա. տարեկան 2 միլիոնից ավելի զանգ են ընդունում, բազմաթիվ վթարների, հրդեհների վայր մեկնում ու արձանագրում տարերային աղետները: Երեկ Աշոցքում երկրաշարժ են արձանագրել, շատ չէր՝ 2.5 բալ:
Նախագահին նաև նախարարության Հոգեբանական ծառայության աշխատանքն է ներկայացվում: Տոնական օրերին Հոգեբանական ծառայությունն էլ է գործելու:
Այցի ընթացքում անձամբ նախագահից պարգևների են ստացել նախարարության մի խումբ աշխատակիցներ:
Արմեն Սարգսյանն ԱԻՆ աշխատակազմին է նվիրել նաև 6 շարժասայլակ: