Բակո Սահակյանն ավելի քան 5 մլն դրամով պարգևատրել է կիոկուշին կարատեի Եվրոպայի չեմպիոն Արթուր Առուշանյանին
Արցախի Հանրապետության նախագահ Բակո Սահակյանի նստավայրում տեղի է ունեցել ԱՀ-ում ֆիզկուլտուրայի և սպորտի ասպարեզում 2018 թվականի արդյունքներով բարձր ցուցանիշների հասած մարզիկների և նրանց մարզիչների պարգևատրման արարողությունը, որի ընթացքում նրանք արժանացել են դրամական խրախուսանքների:
«Արցախպրես»-ի հաղորդմամբ ԱՀ նախագահի կողմից 5 մլն 250 հազար դրամով է պարգևատրվել կիոկուշին կարատե դո մարզաձևից աշխարհի առաջնությունում երկրորդ և Եվրոպայի առաջնությունում առաջին տեղեր գրաված, սև գոտի երկրորդ դան Արթուր Առուշանյանը.
«Ամեն անգամ տոնելով նման հաղթանակներ մենք բարձրացնում ենք Արցախի և Հայաստանի հանրապետությունների դրոշները, որի համար միջազգային ֆեդերացիաների կողմից ենթարկվում ենք սանկցիաների: Մենք էլ մեր լուման ենք ներդնում մեր երկրի զարգացման ու ճանաչման գործում:
Ինձ համար շատ կարևոր է Արցախում սիրողական սպորտը և ֆիզիկական կուլտուրան զարգացնելը, որպեսզի մեր մատաղ սերունդը ֆիզիկապես ուժեղ լինի: Այս տարվա ընթացքում դասընթացներ եմ անցկացրել Բուլղարիայում, Իսրայելում և Ուկրայինայում: Շփվել եմ տարբեր ազգի ներկայացուցիչների հետ: Չթերագնահատելով ոչ մեկի կարողությունները՝ ուզում եմ ասել, որ մենք ունենք բոլոր հնարավորություններն աշխարհում լինելու լավագույնները»,-ասել է Արթուր Առուշանյանը:
Իսկ ուշուի երիտասարդների աշխարհի առաջնությունում առաջին, պատանիների Եվրոպայի առաջնությունում երկրորդ տեղեր գրաված Արսեն Բաղրյանն էլ պարգևատրվել է 2 մլն դրամով:
Նա ասել է, որ 2018 թվականը յուրահատուկ էր, քանի որ ինքը կարողացել է հասնել իր նպատակին՝ հռչակվելով աշխարհի չեմպիոն:
«Հեռավոր Բրազիլիայում մենք կարողացանք բարձրացնել Հայաստանի դրոշը և հնչեցնել հիմնը: Հայաստանը պայքարում էր հզոր ու հարուստ մի շարք պետությունների հետ, ինչպիսիք են Չինաստանը, Հնդկաստանը: Մենք կարողացանք ապացուցել, որ Հայաստանն ուժեղագույնների շարքում է:
Սպորտը պահանջում է մեծ ջանքեր, անմնացորդ նվիրում, ուժեղ կամքի դրսևորում: Յուրաքանչյուր աշխատանք գեղեցիկ է, երբ այն արժևորվում է, ստանում գնահատական: Այդ առումով մենք շնորհակալ ենք մեր երկրի ղեկավարությանը»,-ասել է Արսեն Բաղրյանը:
Դիմելով մարզիկներին և մարզիչներին` Բակո Սահակյանն իր խոսքում մասնավորապես ասել է.
«Մենք բոլորս ուրախանում ու հպարտանում ենք ձեր նվաճումներով: Դուք մեծապես նպաստում եք ոչ միայն մեր հանրապետությունում սպորտի զարգացման ու տարածման, այլև Արցախը աշխարհին ճանաչելի դարձնելու և միջազգային ասպարեզում մեր երկիրն արժանիորեն ներկայացնելու գործին:
Դա յուրօրինակ ծառայություն է հայրենիքին ու հարազատ ժողովրդին և արժանի է բարձր գնահատանքի»: