Մշակույթի նախարարության «կռտած» մասը տանում ենք քաղաքաշինություն. Աբրոյան

Նախարարությունների միավորման նախագծով նախատեսված է հուշարձանների պահպանության ոլորտը, բացառությամբ պատմամշակութային հուշարձանների, տեղափոխել քաղաքաշինական կոմիտեի կազմ: Այս մասին այսօր՝ դեկտեմբերի 26-ին, «Օպտիմա՞լ է նախարարությունների օպտիմալացումը. գնահատում են մասնագետները» թեմայով քննարկման ժամանակ նշեց ՀՀ մշակույթի նախարարության Պատմության և հուշարձանների պահպանության գործակալության պետ Արմեն Աբրոյանը:

Նա հարց ուղղեց, թե ինչ է մշակութային ժառանգությունը, արդյոք մշակութային հուշարձանները չե՞ն, և ո՞րն է քաղաքաշինության գործառույթը. «Նախ Քաղաքաշինության կոմիտեն կարգավիճակով Կառավարության անդամ չէ և մշակման լիազորություններ չունի, այսինքն՝ բացի նրանից, որ առանձնացնում ենք հուշարձանների ցանկից, մշակութային ժառանգություն համարվելուց, կտրում ենք նաև քաղաքականությունից:

Այսինքն՝ մենք ոչ թե օպտիմալացնում ենք, այլ տարանջատում ենք, այսինքն՝ երկու տեղ պետք է քաղաքականություն մշակվի, ո՞րն է խնդիրը նույն սկզբունքները երկու տեղ բաժանելու, դա հակասում է, և ոչ թե կոնվենցիային, այլ Սահմանադրության 15-րդ հոդվածին, ըստ որի՝ պետությունը պաշտպանում է մշակութային ժառանգությունը, իսկ եթե մշակութային ժառանգություն չէ, ի՞նչն է պաշտպանում»,- ասաց նա և հույս հայտնեց, որ գերատեսչության և մյուսների կարծիքների հիման վրա կվերանայվի նախագիծը, կամփոփվի, և նոր լուծում կտրվի:

ՀՀ ԳԱԱ Հնագիտության և ազգագրության ինստիտուտի տնօրեն, պատմական գիտությունների դոկտոր Պավել Ավետիսյանն էլ նշեց, որ հուշարձանների պահպանության խնդիրը միայն ֆիզիկական պահպանությունը չէ, և հիմա տարալուծում են և Մշակույթի նախարարության կառույցներից մեկը վերցնում, տալիս են Քաղաքաշինության կոմիտեին. «Երկրում նոր զարթոնքի ժամանակներ են, և ակնկալիք ունենք ունենալ ավելի լավը, քան մինչ այս կար, հիմա հարց է առաջանում՝ այս խնդիրները լավի՞ն են տանում, թե՞ ոչ: Կառավարման համակարգում ինչ-որ բան այնպես չենք անում»,- ասաց նա:

«Վանաձոր քաղաքի 3/4 մասը ողջ հուշարձանակիր տարածքների վրա է, Հրազդանը, Բջնին, ցանկացած գյուղ ու քաղաքի մի զգալի մասը հուշարձանակիր տարածքների վրա են, և քաղաքաշինական ծրագրի վրա հսկայական բան են կորցրել: Նույն թամանյանական ծրագիրը հին Երևանի վրա է կառուցվել. քանդվել է, հիմա չկա: Այսինքն՝ քաղաքաշինական ծրագիրը հակոտնյա է հուշարձանների պահպանության խնդրին: Պետք է այնպիսի իրավիճակ լիներ, որ հակակշռեին: Արդյոք վաղը խնդիրներ չե՞նք ունենա, ընդ որում, «կռտած» մասն ենք տանում այնտեղ, շատ ուրիշ ոլորտներ լրիվ այլ տեղում են»,- ընդգծեց Աբրոյանը: