Թող երեխան առողջ լինի ու ծառայի. կայանում է ՊՆ-ին կից հասարակական խորհրդի առաջին նիստը
Հայաստանի պաշտպանության նախարարին կից հասարակական խորհրդում այսօր տեղի է ունենում ձմեռային զորակոչի ընթացքում քաղաքացիների դիմումների և բողոքների քննարկման հանձնաժողովի առաջին նիստը:
Դիմումատուներից Հ. Ռ.-ն ասաց, որ մի քանի խնդիրներ հաշվի չի առել բժշկական հանձնաժողովը, ու նշեց, որ երեխան ունի սրտի խնդիրներ, խանգարում, միջնապատը ծուռ է, ճնշման խնդիր ունի: «Վեց ամիս տարկետում են տվել բուժման նպատակով, բայց բուժում չի ստացել, ուղեգիր չեն տվել: Թող բուժվի, տանեն բանակ, սակայն նա մի քանի խնդիր ունի»,-ասաց նա:
Այսպիսով, հանձնաժողովը նշեց, որ առաջարկում են տրամադրել տարկետում՝ հաշվի առնելով սրտի ռիթմի բարձր ցուցանիշը:
Ա. Ա.-ն, ով երեք անգամ արդեն տարկետում է ստացել, այս զորակոչին պետք է որոշվեր՝ կա՛մ մնում է ծառայության, կա՛մ ազատվում է: Նա գանգատվում էր սրտանոթային խնդիրներից, սրտի ռիթմի խանգարումներից:
Ի դեպ, նա նշեց, որ բժշկական կենտրոնում հետազոտության արդյունքները չեն տրամադրել և նշել, որ պատասխանները կարող են ստանալ զինկոմիսարիատում, այնինչ ՊՆ-ին կից հասարակական խորհրդի նախագահ Գեղամ Հարությունյանը նշեց, որ օրենքով կարգավորված է, որ բժշկական կենտրոնը պարտավոր է պատասխանները տրամադրել զորակոչիկին:
Այսպիսով, հանձնաժողովը որոշում կատարեց միջնորդել, որ կրկին փորձաքննություն իրականացվի, քանի որ համանման խնդիրների պարագայում նախկին երեք դեպքերում տրվել է տարկետում:
Զորակոչիկներից Հ. Կ. -ը նշեց, որ կրծքավանդակի ձախողումների կապակցությամբ ձևավորվել են շնչառական խնդիրներ, և միշտ սրտի խնդիրներից է դժգոհել. զինկոմիսարիատը սահմանափակումներով է պիտանի համարել ծառայությանը, և ծնողը նշում է, որ իրենք ցանկանում են կրկին հետազոտել:
Նրա մայրը հայտնեց նաև, որ երեխան սրտի խնդիրների պատճառով երկար բացակայել է դպրոցից և նույնիսկ բացակաների պատճառով մնացել է նույն դասարանում:
Այսպիսով, հանձնաժողովը որոշում կայացրեց հետաձգել վերջնական որոշում կայացնելը և խնդրեց դիմումատուին սրտի հետազոտություն անցկացնել, քանի որ եղած տվյալներով երեխան ենթակա է զինվորական ծառայության:
Զորակոչիկ Գ.Հ.- ն նշեց, որ ինքը լեղապարկի վրա պոլիպ ունի և ուզում է ուղեգրվել վիրահատության համար: Նա նշեց, որ իրեն մի հիվանդանոցում ասել են, թե պոլիպը 0,35 սմ է, իսկ մյուսում՝ 0.5 սմ է: Նա և մայրը մտավախություն ունեին, որ նորագոյացությունը հետագայում հնարավոր է չարորակ ուռուցքի վերածվի. «Զինկոմիսարիատում չեն թողել վիրահատվել, ասել են՝ կարիք չկա: Ինձ անհանգստացնում է միայն այն, որ հետագայում պոլիպը կարող է մեծանալ»,- ասաց նա:
Այսպիսով, հանձնաժողովը արձանագրեց՝ զինակոչիկը պիտանի է ծառայության, կրկնակի հետազոտության համար միջնորդելու կարիք չկա, քանի որ օրենքը սահմանում է, որ 1-1,5 սմ-ի դեպքում են լեղապարկի պոլիպները ենթակա վիրահատման:
Ի դեպ, բոլոր ծնողները նշում էին, որ թող երեխան առողջ լինի կամ բուժվի և ծառայի: