Մարդ կա՝ գյուղում 3 հարկանի տուն ունի, բայց Վանաձորում տնակում է ապրում. Լոռու մարզպետ
Լոռու մարզպետի կարգադրությամբ՝ մարզի Վանաձոր, Սպիտակ և Ստեփանավան քաղաքներում 1988 թվականի դեկտեմբերի 7-ի երկրաշարժի հետևանքով ձևավորված և մինչ այսօր գործող տնակային ավաններում բնակվող ընտանիքների կարգավիճակը և հետագայում բնակապահովման խնդիրներն ուսումնասիրելու, դրանց լուծման համար առաջարկություններ ներկայացնելու նպատակով ստեղծվել է աշխատանքային խումբ: Այն ղեկավարում է փոխմարզպետ Արշակ Հովսեփյանը: Խմբում ընդգրկված են Լոռու մարզպետի խորհրդական Լևոն Ասլանյանը, ներկայացուցիչներ Վանաձորի, Ստեփանավանի, Սպիտակի քաղաքապետարաններից, «Ով, եթե ոչ մենք, ոչ դուք» քաղաքացիական նախաձեռնության անդամներ, տնակային ավանների բնակիչներ:
Հանձնաժողովի առաջին նիստը կայացել է, այն վարել է մարզպետ Անդրեյ Ղուկասյանը: Նիստին մասնակցել են նաև Ստեփանավանի քաղաքապետ Միքայել Ղարաքեշիշյանը և Սպիտակի քաղաքապետ Գագիկ Սահակյանը:
Մարզպետ Անդրեյ Ղուկասյանի խոսքով՝ հանձնաժողովի ամենաառաջնային խնդիրը Վանաձոր, Ստեփանավան և Սպիտակ համայնքներում տնակային ավանների հստակ գույքագրումն է: Այդ նպատակով հատուկ ձևաթուղթ է մշակվել, որը հստակ լրացնելու արդյունքում հնարավոր կլինի ամբողջական պատկեր ստանալ: Դրանից հետո կկազմվի աշխատանքային գրաֆիկ եւ գործնական քայլեր կիրականացվեն:
ՀԺ-ի հետ զրույցում Լոռու մարզպետ Անդրեյ Ղուկասյանն ասաց, որ գործընթացն իրենց նախաձեռնությամբ է, մինչ ընտրություններն էլ Վանաձորի տնակային ավանների խնդրով են զբաղվել. «Վանաձորում տնակային ավանների խնդիրն անընդհատ բարձրացնում էին մարդիկ, քաղաքապետարանում հանձնաժողով կար, բայց քանի որ աշխատանքներն ինձ դուր չէին գալիս, մարզպետարանում ստեղծեցինք հանձնաժողով, ներգրավեցինք բնակիչներին ու քաղաքապետարանի ներկայացուցչին»,- ասաց մարզպետը:
Մանրամասն՝ սկզբնաղբյուր կայքում