Արմեն Գևորգյանը պատմել է, թե ինչու դատարանը չի կալանավորել իրեն (տեսանյութ)
«Դատարանում իմ հայտարարությունը եղել այն մասին, որ ես փորձել եմ ներկայացնել իմ անցած ճանապարհը, ինչով եմ զբաղված եղել վերջին 20 տարիներին ՀՀ-ում՝ վերադառնալով Ռուսաստանից, ինչ սկզբունքներով եմ կազմակերպել իմ աշխատանքը պետական համակարգում, իմ կարծիքով՝ ինչ օգուտ բերել մեր պետությանը: Խնդրել եմ դատարանին հաշվի առնել մի քանի հանգամանքներ, որոնք ըստ ինձ կալանավորման համար հիմք չպետք է հանդիսանան»,- այսօր լրագրողների հետ ճեպազրույցում ասաց նախկին փոխվարչապետ Արմեն Գևորգյանը:
Նշենք, որ դատարանն այսօր որոշում կայացրեց չկալանավորել Գևորգյանին: Նրան մեղադրանք է առաջադրվել ՀՀ ՔՕ մի քանի հոդվածներով: Մասնավորապես, նա մեղադրվում է արդարադատության իրականացմանը խոչընդոտելու, սահմանադրական կարգը տապալելուն օժանդակելու, առանձապես խոշոր չափերի կաշառաք ստանալու և խոշոր չափերով փողերի լվացման համար:
Անդրադառնալով սահմանադրական կարգը տապալելուն օժանդակելու մեղադրանքին՝ Արմեն Գևորգյանն ասաց, որ քննությունը բոլոր հանգամանքները կպարզի: «Մինչև այդ էլ արդեն կայացված դատական վճիռներ կան, օրինական ուժի մեջ մտած, որով արձանագրված է, թե ով ինչ մեղք է ունեցել Մարտի 1-ի շրջանակներում: Իմ համար ևս անակնկալ է եղել, երբ որ 4 ամիս հետո մեղադրանքը փոխվել է՝ հաշվի առնելով,որ երբ օգոստոսի 3-ին դատարանի վրա ազդելու մեղադրանքը ներկայացվում էր, արդեն մեկ շաբաթ առաջ սահմանադրական կարգի տապալման մասին մեղադրանքն ուրիշներին ներկայացվել էր: Ինչ փոխվեց 4 ամսվա ընթացքում, ես չգիտեմ»,- ասաց նա:
Հարցին, թե այն, որ դատարանն իրեն չի կալանավորում, փաստո՞ւմ է, որ դատարաններն անկախ են գործում, Գևորգյանը պատասխանեց. «Իմ համար սպասելի էր հետևյալը՝ երեկ դատական քննության ժամանակ բոլոր կողմերը հնարավորություն են ունեցել իրենց բոլոր փաստարկները ներկայացնել, ես որևէ կողմնակալություն չեմ տեսել: Քանի որ նիստը երեկ անցել է բավական անկաշկանդ՝ իրավական հիմքերը ներկայացնելու տեսնակյունից, բոլոր հնարավորությունները կային, որ դատարանը պաշտպանական կողմի արգումենտներն ընդուներ որպես հիմք: Ես կարծում եմ, որ երկրում ստեղծված իրավիճակը շատերին հուշում էր, որ կարող էր մեկ այլ որոշում էլ լինել»: