Խորհրդարանում «հեղափոխական մեծամասնությունն» է, բայց հեղափոխությունը չի ավարտվել. մեծամասնությունը բացարձակ չէ. Գրիգորի Տրոֆիմչուկ

«168 ժամ» թերթը գրում է. «Մասնակցության տվյալ ցուցանիշն ունի երկու պատճառ: Առաջինը՝ հասարակական լարման բարոմետրը, որն ապրիլ ամսից ամենաբարձր նիշի վրա էր, սկսեց նվազել, բայց Նիկոլ Փաշինյանը հասցրեց անցկացնել դեկտեմբերյան ընտրությունները և, ինչպես ասում են, հասցրեց ընթացքից մուտք գործել գնացքի վերջին վագոն:

Երկրորդ՝ շատ վերլուծաբաններ կարծում էին, որ նույն ապրիլ-մայիս ամիսներին բողոքական հատվածի մեծ մասը Հայաստան է եկել արտերկրից, և ակցիաների մոբիլիզացիան Հայաստանի ներսում տեղի չի ունեցել: Եվ երևում է, որ փորձագետները ճիշտ դուրս եկան, քանի որ այս անգամ աջակցություն այնտեղից չեղավ, հենց այդ պատճառով էլ ընտրողները երկու անգամ քիչ եղան»,- «168 ժամի» թղթակցի հետ զրույցում այս մասին ասել է ռուս քաղաքական վերլուծաբան Գրիգորի Տրոֆիմչուկը՝ անդրադառնալով խորհրդարանական ընտրություններին մասնակցության ցուցանիշին:

Նրա խոսքով՝ թեև խորհրդարանում «հեղափոխական մեծամասնությունն» է, բայց հեղափոխությունը չի ավարտվել, իսկ մեծամասնությունն ըստ էության բացարձակ չէ: «Եթե մասնակցությունը մոտ լիներ 70-80%-ին, ապա ներկայումս Նիկոլ Փաշինյանը կարող էր տոնել իր միանշանակ հաղթանակը: Բայց նման բան չկա»:

Իր հերթին՝ ռուս քաղաքագետ Ստանիսլավ Տարասովն ասել է, որ ընտրությունների արդյունքները և' մասնակցության, և' գրանցած արդյունքների տեսանկյունից անհանգստացնող են: Նրա բնորոշմամբ՝ իրավիճակը նույնիսկ վտանգավոր է, քանի որ ձևավորվելիք հեղափոխական խորհրդարանն ըստ էության չի ունենալու ողջ հասարակության աջակցությունը, այնինչ նրանք պետք է սկսեն երկրում լուրջ բարեփոխումներ իրականացնել, որը ստացվելու է, որ չի արժանանալու ողջ հասարակության հավանությանը. «Ինչո՞ւ է մասնակցությունը ցածր, որովհետև բողոքական ընտրազանգվածը պարզապես չի մասնակցել ընտրություններին, ինչո՞ւ է հրաժարվել, որովհետև կա հիասթափություն, կա հավատի բացակայություն այս հեղափոխության վերաբերյալ:

Այսինքն՝ այս մասնակցությունը, ըստ իս, ցույց է տալիս, որ հեղափոխություն չի եղել, այլ եղել է պետական հեղաշրջում»:

Իսկ ռուս մեկ այլ վերլուծաբան՝ Ալեքսանդր Սկակովը, կարծում է, որ ընտրությունների և´ արդյունքները, և´ մասնակցության ցուցանիշն օրինաչափ են, քանի որ, նրա համոզմամբ, գործել է կանխատեսելիության գործոնն ու վարչական ռեսուրսի բացակայությունը»:

Մանրամասն՝ թերթի այսօրվա համարում: