Դավիթ Շահնազարյանը նախկինում շիզոֆրենիա է ունեցել. եթե մենք չգայինք, Ղարաբաղը հանձնած կլինեին. Սասուն Միքայելյան
Մեր համայնքում ընտրողների ակտիվությունը ցուցաբերվում է 17:00-ից հետո՝ ժամը 18:00-ին: Ինձ չի թվում, թե նախորդ ընտրությունների համեմատ ընտրողների մասնակցության ցածր ցուցանիշ կգրանցվի: Այս մասին, պատասխանելով Tert.am-ի հարցերին, ասաց «Իմ քայլը» դաշինքի անդամ, պատգամավորի թեկնածու Սասուն Միքայելյանը:
Հարցին՝ ինչո՞ւ է 14:00-ի դրությամբ Հրազդանում 24 տոկոս մասնակցություն գրանցվել, Ս. Միքայելյանը պատասխանեց. «Այն ժամանակ ընտրություններն այնպես էին, կարծես մարտական գործողություններ լինեին՝ ծեծ ու ջարդով, ոստիկաններով, վարչական լծակների կիրառմամբ: Հիմա տեսնում ենք, թե ինչ ընտրություններ են, մարդիկ գալիս են, ազատ ընտրում են: Իսկ նախկինում ընտրություններ չեն եղել»:
Պատասխանելով այն հարցին, թե արդյոք Դավիթ Շահնազարյանին ԱԱԾ հրավիրելը կապ ունի իր հայտարարությունների հետ, թե Շահնազարյանն իր ասածների համար դեռ պետք է պատասխան տա, Սասուն Միքայելյանը նշեց, որ ինքն այդ գործի հետ կապ չունի:
«Դավիթ Շահնազարյանը հիվանդ մարդ է, նախկինում շիզոֆրենիա է ունեցել, էլի եմ ասում՝ իր նախկին ասածների համար պիտի պատասխան տա: Եթե մենք չգայինք, Ղարաբաղը իրանք հանձնած կլինեին: Պատերազմն իմ կյանքի առավելագույն հատվածն է, որը ես դրել եմ իմ ժողովրդի, Արցախի անկախության համար: Ինչպես նախկինում Սերժ Սարգսյանը փորձում էր բաժան-բաժան անել ազատամարտիկներին, կռվացնել, հիմա էլ փորձում է. չի ստացվելու»,- մանրամասնեց նա:
Ինչ վերաբերում է Օմարի մարտական գործողություններին, Սասուն Միքայելյանն ընդգծեց, որ Օմարը ընկել է դեկտեմբերի 27-ին, ինքն այնտեղ է եղել դեկտեմբերի 31-ի գիշերը, հունվարի 1-ի լույս առավոտյան՝ «ոտքի ֆիքսատորով»:
Հարցին՝ արդյոք քարոզարշավի ընթացքում իր հայտարարությունների հետ կապված Նիկոլ Փաշինյանի հետ ծանր խոսակցություն ունեցե՞լ է, Ս. Միքայելյանը վստահեցրեց, որ ինքը Փաշինյանի հետ խնդիր չունի, փորձում են «այնպես անել, որ հարց լինի, բայց չի լինի»