2019-ին Ռուսաստանը 20% պակաս թվով աշխատող է ընդունելու այլ երկրներից․ կառավարության որոշում

144 հազար 583 աշխատակից․ սա թիվն է այն մարդկանց, որոնց Ռուսաստանը թույլ կտա աշխատել այդ երկրում՝ լինելով այլ պետության քաղաքացի։ Այլ բառերով՝ «խոպան գնացողների» թիվը Ռուսաստանը մտադիր է կրճատել 20 տոկոսով՝ 2018 թվականի համեմատությամբ, և սրա վերաբերյալ որոշումն ընդունել է այդ երկրի կառավարությունը։

Հիմնավորումն այն է, որ այդպիսի աշխատողների պահանջարկը նվազել է։ Ավելին, Ռուսաստանի կառավարությունը քվոտաներ է հատկացրել յուրաքանչյուր մասնագիտության կամ արհեստի տեր մարդկանց համար։ Այդ քվոտայի համաձայն՝ ամենաշատ տեղերը կլինեն լեռնային, շինմոնտաժային ու շին-նորոգման ոլորտների աշխատակիցներինը՝ 52 հազար տեղ։

Եվս մոտ 20,5 հազար մարդ կներգրավվի մեծ ու փոքր արդյունաբերական ձեռնարկություններում աշխատանքների համար, իսկ 16 հազար աշխատող՝ մետաղամշակման ու մեքենաշինական ձեռնարկություններում։ Մյուս ոլորտների քվոտաները չեն գերազանցում 10 հազար տեղը։ Քվոտաների բաշխման ամբողջ աղյուսակը հասանելի է փաստաթղթում։

Թե ինչ մեթոդով են որոշելու այդ տեղերում ընդունվողներին, չի հստակեցվում։ 2018 թվականին Ռուսաստանում աշխատանքի ընդունվող օտարերկրացիների թվի բարձրագույն շեմը սահմանվել էր 178 հազար 450 տեղը։ Որքանո՞վ է լրացվել այդ պահանջարկը, նույնպես հայտնի չէ, բայց օտարերկրացի աշխատակիցների քանակը Ռուսաստանում տասնապատիկ ավելի մեծ է եղել։

Մինչ այս էլ տեղեկություններ էին հրապարակվել, որ Ռուսաստանի կառավարությունն առաջարկում է 2019 թվականին սահմանափակում մտցնել շինարարարական ընկերություններում և թույլ չտալ, որ շինհրապարակներում աշխատողների թվում օտարերկրացիների թիվը գերազանցի 80 տոկոսը։ Այսինքն, եթե այսպիսի նախագիծ ընդունվի, ապա դա շինկազմակերպություններին կպարտադրի աշխատողների 20 տոկոսին ընտրել Ռուսաստանի քաղաքացիներից։

Հայաստանի քաղաքացիների վրա այս նախագծի ազդեցությունը դժվար է գնահատել, սակայն այն ընկերությունները, որոնց հարցում է արել ռուսական «Վեդոմոստի» պարբերականը, հայտնել են, որ այս նոր կարգավորումը մեծ ազդեցություն չի ունենա իրենց ու աշխատաշուկայի վրա։ Ավելին, այս սահմանափակումը չի գործի Մոսկվայում, Խաբարովսկի և Ամուրի շրջաններում (վերջին երկուսը Ռուսաստանի հեռավոր արևելյան շրջաններն են, որտեղ հիմնականում Չինաստանից եկածներն են աշխատում)։

Ռուսաստանում այս պահին շինարարության վրա աշխատողների թիվը 6,3 միլիոն է, որի զգալի մասը հենց այլ երկրների քաղաքացիներն են, այդ թվում՝ բազմաթիվ հայաստանցիներ։