Նիկոլ Փաշինյանն իր ձեռքով ցեմենտել և տեղադրել է ապագա գործարանի առաջին քարը (տեսանյութ)
Վարչապետի ժամանակավոր պաշտոնակատար Նիկոլ Փաշինյանն այսօր Գյումրիում մասնակցել է «Սանտեքս» գործարանի բացմանը և միաժամանակ նոր հիմնաքար դրել մեկ այլ գործարանի կառուցման համար:
Գործարանի սեփականատերերն են հանդիսանում Վարդան Սրմաքեշնն ու Քրիստիան Գելիջին:
«Մենք այս գործարանում 2016 թ-ից շինարարություն ենք անում և մեկ ամիս առաջին 150 աշխատողի ընդունեցինք, մինչև ապրիլ ամիսը ևս 150 հոգի պետք է ավելացնենք, ապա մենք պետք է խնդրենք Ձեզ, որ դուք նոր շենքի առաջին քարը դնեք: Ես և իմ գործընկեր Վարդան Սրմաքեշը որոշել ենք այս մեկի նման Հայաստանի տարբեր վայրերում տեքստիլ գործարաններ ստեղծենք: Հաջորդ գործարանը լինելու է Սպիտակում: Արթիկում մենք ցանկացանք սարքել գործարան, սակայն դպրոցի տարածք էր, և ծնողները բողոքեցին: Արթիկի 5 դպրոցները քիչ աշակերտներ ունեն, ավելի լավ է պետությունը դրանք միավորի և շանս տա, որ ժողովուրդը գործ ունենա: Մենք 5 եղբայրներ ենք՝ արմատներով սասունցի և եկել ենք Գյումրիում գործարան ենք կառուցել, մենք բոլորս հայ ենք, մեր նպատակը պիտի լինի մեր հայրենիքը»,- նշեց Քրիստիան Գելիջին:
Նրա խոսքով՝ այսօր վարչապետին ոչ թե պետք է քննադատել, այլ նրա հետ աշխատել, նրան օգնել և կառուցել մեր երազած երկիրը:
Այդ ամենին ի պատասխան՝ վարչապետի պաշտոնակատար Նիկոլ Փաշինյանը մոտեցավ գործարարին և նշեց.
«Մեկ շաբաթվա ընթացքում արդեն 2-րդ գործարանի մեկնարկն է: Դրանք բացվել են սփյուռքահայ մեր հայրենակիցների ներդրմամբ: Սա իսկապես 100 տոկոսով համապատասխանում է տնտեսական հեղափոխության մեր պատկերացումներին: Մարդիկ, ովքեր կապ չունեն կառավարության հետ, իրենք անում են իրենց քայլը և պահանջատեր են, որ կառավարությունն առավել համապատասխան պայմաններ ստեղծի իրենց համար: Քննադատությունները կառավարության մասին, որ դանդաղ է ինչ-որ բան, հաճելի են: Մարդիկ ներգրավում են կառուցման և արարման գործընթացի մեջ, և նախանձախնդիր լինելու դրդող ցանկացած քննադատություն մեզ համար հաճելի է: Հայաստանում գործարար մարդու կարգավիճակը նույնպես պիտի լրջագույն ընկալման փոփոխության ենթարկվի»:
Նիկոլ Փաշինյանը շնորհակալություն է հայտնել բոլոր այն մարդկանց, ովքեր այս 27 տարվա ընթացքում «քարը քարի վրա են դրել»:
Վարչապետի պաշտոնակատարը նշել է, որ ներդրումների միջոցով պատմամշակութային շատ արժեքներ նոր կյանք են ստանում:
Նիկոլ Փաշինյանը Քրիստիան Գելիջիի հետ ծանոթացել է գործարարի կողմից կառուցվելիք ապագա գործարանի հատակագծին, ապա ցեմենտի միջոցով ամրացրել ապագա գործարանի առաջին քարը: