Սև-սպիտակի մարտավարությամբ ստեղծվել է մի վիճակ, երբ եթե դեմ ես Նիկոլին, քվեարկիր Հանրապետականի օգտին. Սուրեն Սահակյան
«Նախապես ուզում եմ տեղեկացնել՝ կոալիցիոն և կիսակոալիցիոն հին ուժերի հետ խոսելու որևէ բան չկա, չկա մի պարզ պատճառով, նրանք ապականել են մեր երկիրը, վերացրել են արդարադատությունը, ջնջել են բարու և չարի սահմանները, 100 հազարավոր քաղաքացիների զրկել են իրենց երկրում ապրելու և իրենց կյանքը տնօրինելու իրավունքից»․- Հանրային հեռուստաընկերության ուղիղ եթերում Նախընտրական մեծ բանավեճի ժամանակ հայտարարեց «Քաղաքացու որոշում» սոցիալ-դեմոկրատական կուսակցության նախընտրական ցուցակը գլխավորող Սուրեն Սահակյանը։
Նա նաև նշեց, որ Հանրապետականի կառավարման տարիներին, անձամբ ինքը իր իրավունքները իրացնելու համար բազմիցս հայտնվել է ոստիկանությունում և դատարաններում․ «իսկ քանիսն են լռեցվել, ծեծվել և հայտնվել ճաղերից այն կողմ, նրանք աղճատել են հանրային բոլոր հարաբերությունները, քաղաքացուն սարքել են բարեգործության ընտրակաշառքի սպասող իրավազուրկ օբյեկտի»։
Սահակյանն այնուհետև խոսքն ուղղեց Նիկոլ Փաշինյանին՝ «երբ ես, դուք և մեր այլ ընկերներ խոսում էինք հեղափոխության մասին, մի՞թե այսպիսի Հայաստան էինք պատկերացնում, որտեղ պատգամավորի մանդատի հայտ է ներկայացնում ընտրակեղծարար, պետության շահերի հաշվին սեփական շահերը սպասարկող հանցագործների խմբակ, դուք ինքներդ սկսեցիք արհեստական շնչառություն տալ քաղաքական դիակներին, և ինչի՞ դա հանգեցրեց, հանգեցրեց նրան, որ սև-սպիտակի մարտավարությամբ ստեղծվել է մի վիճակ, երբ եթե դեմ ես Նիկոլին, քվեարկիր Հանրապետականի օգտին»։
Նա ընդգծեց, որ եթե հանրապետականը հայտնվի խորհրդարանում, դրա քաղաքական պատասխանատուն Փաշինյանն է լինելու։