Մեր երկրից թալանվածը պետք է վերադարձվի պետությանը և ժողովրդին. Փաշինյանը՝ Մեծամորում

Այստեղ է գտնվում մեր երկրի ամենառազմավարական օբյեկտը՝ հայկական ատոմային էլեկտրակայանը, որն, ըստ էության, Հայաստանը դարձնում է միջուկային տեխնոլոգիաներին տիրապետող պետություն։ Այս մասին այսօր՝ դեկտեմբերի 4-ին, Մեծամորում քաղաքացիների հետ հանդիպման ժամանակ ասաց «Իմ քայլը» դաշինքի ընտրական ցուցակը գլխավորող Նիկոլ Փաշինյանը՝ նշելով, որ դա շատ կարեւորը հանգամանք է։ Դրանով ՀՀ ժողովուրդը ի ցույց է դրել իր գիտական, ստեղծագործական տաղանդը։

Փաշինյանը իր ելույթում նշեց, որ իրենց համար խոչընդոտներ չեն լինելու, հաղթահարելու են ամեն ինչ. «Մենք մանդատ ենք խնդրում աշխատանքը խրախուսելու համար: Մենք հենց այդ ուղղությամբ պետք է գնանք։ Մեր ամենակարեւոր խնդիրը քաղաքացուն քաջալերելն է, մեր քաղաքացին չպիտի լինի ծուռ վզով։ Ազգովի ոտքի ենք կանգնել, ուղղել ենք մեր մեջքը, շարժվում ենք ապագա։ Մենք խոչընդոտները հաղթահարելու ենք։ Կյանքը առանց խոչընդոտների հետաքրքիր չէ, եւ ես կարծում եմ՝ ով–ով, բայց ՀՀ քաղաքացին դա գիտի»,-ընդգծեց Փաշինյանը:

Նրա խոսքով՝ 27 տարի Հայաստանը թալանվել է, սակայն այժմ պետք է հետ պտտվի այդ պրոցեսը՝ համաժողովրդական պահանջ ձեւակերպելով. «Մենք պետք է համաժողովրդական պահանջ ձեւակերպենք, որ մեր երկրից թալանվածը պետք է վերադարձվի պետությանը եւ ժողովրդին։ Բայց մենք այս պրոցեսի մեջ խնդրողի կարգավիճակում չենք լինելու, այլ՝ պահանջատիրոջ կարգավիճակում։

Բոլոր այն պաշտոնյաները, որոնք իրենց պաշտոնավարման ընթացքում միլիոններ, միլիարդներ են կուտակել, պետք է հատիկ–հատիկ բացատրություն տան իրենց կուտակածի համար։ Մենք ամեն մի կոպեկի հետեւից գնալու ենք, մեր ողջ իրավապահ համակարգը պետք է պատրաստված լինի այս պրոցեսին։ Այն, ինչ անհնար է, մենք ուս ուսի կտանք, կդարձնենք հնարավոր։ Եթե ոմանք նախկինում ասում էին՝ այ էս երկիրը երկիր չի, հիմա հույս ունեմ, որ նույն մարդիկ տեսել են, որ այսօր մեր երկիրը աշխարհում ժողովրդավարության առումով վստահ քայլում է առաջատարներից առաջ»։