«Հանրապետականի» հետ բանավիճելու որևէ բան չունեմ, նրանց հետ կարելի է գնալ դատարան, ներկայացնել կոնկրետ մեղադրանք․ Դավիթ Սանասարյան

Պետական վերահսկողական ծառայության պետ, խորհրդարանական ընտրություններին «Իմ քայլը» դաշինքի պատգամավորության թեկնածու Դավիթ Սանասարյանի խոսքով՝ ինքն այս օրերին քարոզարշավի ընթացքում լավ ընդունելության է արժանանում: Նա Tert.am-ի հետ զրույցում ներկայացրեց՝ ժողովուրդը նրան շատ ջերմ է ընդունում, 10-ից 9-ը դրական է տրամադրված, նրան ճանաչում են:

«Հիմնականում նյարդայնանում են հանրապետականների ելույթներից: Մեզ խնդրում են, որ նրանց «ձայնը կտրենք»: Բայց մենք ասում ենք, որ դա մեր գործը չէ, դա պետք է լինի իրենց ընտրությունը»,- ասաց նա: Քարոզարշավի ընթացքում նա արձակուրդի մեջ է: Իր խոսքով՝ դրանից պետական վերահսկողական ծառայությունը չի տուժում:

«Ես այնպիսի կադրային քաղաքականություն եմ իրականացրել, որ մեր աշխատակիցները նորմալ, բնականոն հունով իրենց գործունեությունն են իրականացնում: Փորձում եմ չխառնվել ընթացքում, բայց տեղեկանում են, թե ինչ է կատարվում կառույցում»,- ասաց նա:

Դիտարկմանը, թե իր՝ պաշտոնի նշանակման ժամանակվանից հայտարարում էր, որ շատ բացահայտումներ են անելու, սակայն այդպես էլ մեծ թվով սենսացիոն բացահայտումներ չեղան, չնայած որ հասարակությունը սպասում էր դրանց, նա արձագանքեց․ «Բավականին գործ ենք արել այս ընթացքում: Մենք ոչ թե սենսացիաների հետևից էինք գնում, այլ անում էինք ամեն ինչ, որ մեր աշխատանքից հետո պետական հիմնարկները մաքրվեն նախկին արատավոր բեռից: Մեր գործունեության արդյունքում պետբյուջե ենք բերել 1 միլիոն 200 հազար դոլար, դեռ բավական շատ ուսումնասիրություններ կան, որոնց վնասն արդեն գնահատել ենք, ներկայացրել ենք համապատասխան մարմիններին»,- ասաց նա:

Ըստ նրա՝ իրենց վերջին ուսումնասիրությունները եղել են ԵՊՀ-ում, եկող շաբաթվա վերջ արդեն վերջնական կունենան ԵՊՀ-ում արված ուսումնասիրությունների պատկերը: «Հավատարմագրման ազգային ՊՈԱԿ-ում ենք ուսումնասիրություններ արել: Մենք շարունակում ենք մեր ուսումնասիրությունները: Դա այն կառույցն է, որը լիցենզիա է տալիս այս կամ այն արտադրություն իրականացնող ընկերություններին։ Քրեակատարողական վարչությունում ենք ուսումնասիրություն անում, ծավալը բավականին մեծ է, դժվար է արագ ավարտելը: «Աջակցություն դատապարտյալներին» հիմնադրամում ենք հիմա»,- նշեց նա՝ հիշատակելով, որ մի շարք համայնքներում են յուրացումներ եղել, և դրանց հետ կապված քրեական գործեր են հարուցվել:

Նա նաև հիշատակեց, որ ինքը ժամանակին նաև ասել է, որ Պաշտպանության նախարարությունից են սկսելու իրենց ստուգումները, քանի որ շատ են գնահատում երկրի համար կարևորագույն համարվող կառույցի աշխատանքը: «Բայց, քանի որ այլ կառույցներ արդեն գործունեություն են ծավալել մինչև մեր սկսելը, նպատակահարմար չեն համարել՝ մենք էլ լինենք նույն տեղում»,- ասաց նա:

Դիտարկմանը, թե մամուլում խոսվում է այն մասին, որ պաշտպանության նախարարի պաշտոնակատարն իրեն թույլ չի տվել ՊՆ-ում ստուգումներ անի, Դավիթ Սանասարյանը պատասխանեց․ «Չի կարող նման բան լինել, դա սուտ է: Որևիցե կառույց չի կարող մեզ թույլ տալ ստուգումներ անել կամ թույլ չտալ: Մեր ստուգումներին համաձայնություն տալիս է վարչապետը, և այլ կառույցներ չեն կարող թույլ տալ կամ չտալ: Պաշտպանության նախարարը, վստահ եմ, մեզ սիրով ընդունելու է, երբ մենք սկսենք ստուգումները»,- ասաց նա:

Ընտրություններում հաղթանակից հետո որտե՞ղ է իրեն պատկերացնում Դավիթ Սանասարյանը: Նրա խոսքով՝ վարչապետի և իր թիմակիցների հետ կորոշեն, թե ում օգտակար գործողության գործակիցը որտեղ ավելի բարձր կլինի: «Ես ինքս զգում եմ, որ այս գործում տրամաբանության մեջ եմ մտել և պատրաստ եմ շարունակել, բայց եթե այլ մոտեցում կլինի, միասին կքննարկենք»,- ասաց նա:

Արձագանքելով քարոզարշավի դիտարկմանը, թե քարոզարշավի ժամանակ քննարկումներ կան, ըստ որոնց, «Իմ քայլը» դաշինքը՝ վարչապետի պաշտոնակատար Նիկոլ Փաշինյանի գլխավորությամբ «կոշտ հռետորիկա» է ընտրել, անցել են վիրավորանքներին և ատելության խոսքի տարածմանը, նա նշեց․ «Չկա նման բան: Վարչապետը նույնպես կոչ է անում լինել հանդուրժող, բայց ոչ կոռուպցիայի, հանցագործության և անօրինականության նկատմամբ»,- ասաց նա՝ հիշատակելով, որ ինքն անձամբ իր քարոզարշավը կոչում է «սիրարշավ» և ջերմությամբ է լցնում երևանյան բակերը:

Դավիթ Սանասարյանի խոսքով՝ մեկնաբաններն ու վերլուծաբանները խտացնում են գույները, երբ համարում են, որ քարոզարշավում ատելության խոսք կա: «Բնականաբար, սուր քննադատությունները ևս մտնում են քաղաքական տրամաբանության մեջ: Որևիցե մեկը չի կարող ասել, որ երբ սուր քննադատում ես, ատելություն ես տարածում: Մենք ինքներս ենք ատելության դուռը փակել ու ատելություն չեք կարող քարոզել»,- ասաց նա:

Հարցին էլ, թե ի՞նչ կարծիք ունի այս ընտրություններին տարածված դարձած քաղաքական բանավեճերի ձևաչափերի մասին, պատգամավորության թեկնածուն պատասխանեց․ «Առհասարակ բանավեճային մշակույթը կարևոր է քաղաքականության մեջ, բայց կոնկրետ ես «Հանրապետականի» հետ բանավիճելու որևէ բան չունեմ: Մի քանի անգամ եղել են հրավերներ, ես պատասխանել եմ, որ «Հանրապետականի» հետ կարելի է գնալ դատարան, ներկայացնել կոնկրետ մեղադրանք, թե ինչպես են պետությունը թալանել»,- ասաց նա:

Իսկ պատճառը, որ քարոզարշավում մրցակցությունն «Իմ քայլը» դաշինքի և «Հանրապետական» կուսակցության միջև է, այդ երկու ուժերն են միմյանց մեղադրում, Դավիթ Սանասարյանի խոսքով՝ բնական է․ «Հանրապետականները երկար տարիներ իշխանության գլուխ են եղել, բռնազավթել են իշխանությունը, իսկ մնացած ուժերի հետ տարաձայնություններ չկան․ կա բանավեճ, բայց տարաձայնություն չկա»:

Դիտարկմանը, թե այդ հանգամանքը չի՞ ազդելու ապագա խորհրդարանում ընդդիմության ձևավորման վրա, չի՞ նշանակելու, որ ուժեղ ընդդիմություն չի լինելու, նա պատասխանեց․ «Չեմ կարծում, որ նման խնդիր կլինի, քանի որ ցանկացած իշխանություն կանի նաև սխալներ, իսկ սխալներին կլինեն ընդդիմախոսներ: Ես կարծում եմ, որ նորմալ քաղաքական մշակույթ է ձևավորվելու: Նախկինում եղած հայհոյանքը չի լինելու, ունենալու ենք զարգացած քաղաքական դաշտ: Մենք ամեն ինչ անելու ենք, որ կուսակցական համակարգն առողջանա, որը տարիներ շարունակ քանդվել էր: Կարծում եմ, որ վաղվա օրը դրական է լինելու»:

Հարցին էլ, թե ինքը հանրապետականներին տեսնո՞ւմ է խորհրդարանում, Դավիթ Սանասարյանը պատասխանեց․ «Ժողովուրդը պետք է տեսնի, բայց ժողովրդի տրամադրությունը ստուգելիս տեսնում ենք, որ «Հանրապետականը» տեղ չունի: Իրենք էլ դրա համար որոշել են չշփվել ժողովրդի հետ»:

Դավիթ Սանասարյանն անդրադարձավ նաև իշխանությունների վարած արտաքին քաղաքականությանը: Նշելով, որ չնայած ինքը չի մասնակցում դրա ձևավորմանը, նա ասաց՝ ունի իր կարծիքը՝ ՀՀ-ն վարում է բալանսավորված քաղաքականություն: «Ինձ համար դա բալանսավորված քաղաքականություն է»,- ասաց նա:

Դիտարկմանը, թե իրեն շատերը համարում եմ արևմտամետ գործիչ, հիշատակում են, որ դեմ էր ՀՀ-ի՝ Ռուսաստանի հետ հարաբերությունները խորացնելուն, նա պատասխանեց, որ մշտապես է ասել, որ ինքը որևէ «ուղղությունամետ» չէ: «Ես իմ գործունեության ողջ ընթացքում ծառայել և ծառայում եմ Հայաստանի Հանրապետությանը: Այլ բան է, որ ես տեսնում էի Հայաստանին եվրոպական, քաղաքակիրթ ընտանիքում, իսկ Ռուսաստանն այդպիսի միավոր չէ, այն պետություն է: Կա Արևմուտք, որի հակակշիռը մեր ռազմավարական գործընկեր Ռուսաստանն է, որի հետ մենք հիմա շատ ավելի լավ հարաբերություններ ունենք»,- ասաց նա:

Ըստ վերջինիս՝ իրենց իշխանությունը որոշել է շարունակել ՀՀ-ի անդամակցությունը ԵԱՏՄ-ի, ՀԱՊԿ-ի կազմում․ ըստ նրա՝ կան խոչընդոտներ, բայց կան նաև շահեր, որոնք պետք է սպասարկվեն: Դավիթ Սանասարյանը նաև 4-րդ ընտրական տարածքում ռեյտինգային թեկնածու է, որտեղ առաջադրված են նաև իր կուսակիցները: Նրա խոսքով՝ ինքը որևիցե մեկի հետ մրցակցության դուրս չի եկել։

«Ես իմ համախոհների հետ, որոնց թիվը օրեցօր ավելանում է, քայլում ենք ընտրական տարածքի փողոցներով, շփվում ենք քաղաքացիների հետ, իմ խոսքն եմ փոխանցում քաղաքացիներին, մեր ուժի ծրագիրն ենք ներկայացնում: Այնպես որ, ես մրցակցության դուրս չեմ եկել: Չնայած ռեյտինգային ընտրակարգ է, և պարզ է դառնում, թե որ թեկնածուն քանի ձայն է հավաքում, այնուամենայնիվ ես ոչ թե մրցակցում եմ, այլ իմ խոսքն ու գործն եմ ներկայացնում քաղաքացիներին»,- ասաց նա:

Իրեն ընտրողներն էլ, ըստ Դավիթ Սանասարյանի, առաջինը հաշվի են առնելու իր տարիների պայքարի փորձը, նաև վերահսկողական ծառայություն իր աշխատանքը: «Հաշվի կառնվեն նաև իմ կրթությունն ու ազնվությունը: Ես անգամ մարդկանց ջերմ ընդունելությունից հասկանում եմ, որ նրանք իրենց ընտրությունն արդեն կատարել են»,- ասաց նա: