Բա մի կառավարություն, ասենք էդքան տուպոյ եղավ, գնաց ինչ-որ դավադրությունների մեջ մտավ, բա հետո հետ չի գալո՞ւ. Փաշինյան

Ես կողմ եմ քննադատությանը, դա կարևոր է բոլորիս համար, բայց չի կարելի սեփական նեղ քաղաքական շահերի համար սուտը տարածել ու հարվածել ազգային անվտանգությանը: Այս մասին Արարատ քաղաքում քարոզարշավի ընթացքում բնակիչների հետ հանդիպման ժամանակ նշեց վարչապետի պաշտոնակատար, «Իմ քայլը» դաշինքի ցուցակը գլխավորող Նիկոլ Փաշինյանը՝ կոչ անելով չհավատալ սադրիչ լուրերին, որոնք ոմանք էժան դիվիդենտներ շահելու համար անում են:

«Այսօր ուժեր կան, որ այդ ճանապարհով են գնում: Մեզ այսօր փորձում են մեղադրել Արցախի դեմ ինչ-որ դավադրություններում ներգրավված լինելու համար: Ես հասկանում եմ նաեւ նախընտրական տրամաբանությունը, բայց երբ նման լուրջ մեղադրանքներ են ներկայացնում, դա արդեն միայն քաղաքական հարթակում քննարկելու հարց չէ: Այո, այդ մարդիկ պետք է գնան եւ համապատասխան մարմիններին տան բացատրություններ:

Ասում են՝ այս հեղափոխությունը դավադրություն է Արցախի ու Հայաստանի դեմ, պետք է պատասխան տան, թե դա ինչ դավադրություն է: Իհարկե դա սուտ է, որովհետեւ հեղափոխությունն արել է ժողովուրդը եւ նման մեղադրանք ներկայացնողը նման դավադրության մեջ մեղադրում է ամբողջ ժողովրդին:

Բա մի կառավարություն, ասենք էդքան տուպոյ եղավ, գնաց ինչ-որ դավադրությունների մեջ մտավ, բա հետո հետ չի գալո՞ւ»,-հայտարարեց Փաշինյանը:

Նա իմեց նախորդ իշխանություններին՝ նշելով. «Իրենք իրենց խառնում են ուրիշների հետ: Էդ դուք եք, որ երբ գնացել եք բանակցությունների, մտածել եք՝ բա մեր Բրյուսելի բիզնեսի վերջն ինչ է լինելու, Մոսկվայի բիզնեսի վերջն ինչ է լինելու, ԱՄՆ-ում մեր անշարժ գույքի վիճակն ինչ է լինելու»:

Փաշինյանի խոսքով, Հայաստանում եկել է մի իշխանություն, որ ոչ մի տեղ ոչ մի բիզնես շահ չունի, որի դեմ ոչ մեկը ոչ մի կոմպրոմատ չունի եւ չի կարող ունենալ: «Սա է տարբերությունը Հայաստանի արտաքին քաղաքականության: Ես հստակ ասում եմ, որ երկրագնդի վրա չկա որեւէ ուժ, որ մեր կառավարության վրա ազդելու լծակ ունենա: Միակ ուժը ժողովուրդն է, որ լծակ ունի մեզ վրա, ուրիշ մեկը գլուխը պատով կտա, որ կփորձի լծակ օգտագործել»: