Արենիում կառուցվում է «Թուֆենկյան» ամենամեծ հյուրանոցը Հայաստանում. դա տասնյակ միլիոն դոլարի ներդրում է. Նիկոլ Փաշինյան
Արենի համայնքը տնտեսական հեղափոխության ամենակարևոր կենտրոններից մեկն է լինելու: Այստեղ շատ կարևոր ներդրումային ծրագիր է իրականացվում, որի արդյունքում կառուցվելու է «Թուֆենկյան» հյուրանոցային համալիրը:
Արենի համայնքում նախընտրական քարոզարշավի ժամանակ այս մասին հայտնեց ՀՀ վարչապետի պաշտոնակատար, «Իմ քայլ»-ը դաշինքի ցուցակը գլխավորող Նիկոլ Փաշինյանը: «Շատ են խոսում՝ ներդրումներ կան Հայաստանում կամ չկան, բայց Արենի համայնքում հիմա շատ կարևոր ներդրումային ծրագիր է իրականացվում՝ «Թուֆենկյան» հյուրանոցային համալիր է կառուցվում: Դա տասնյակ միլիոն դոլարի ներդրում է Արենիում, և դա լինելու է«Թուֆենկյան» ամենամեծ հյուրանոցը Հայաստանում:
Արենիում այս հյուրանոցի բացումն անելու է տնտեսական հեղափոխություն»,- ասաց Փաշինյանը: Վարչապետի պաշտոնակատարի կարծիքով՝ այն, որ այդ հյուրանոցը կառուցվում է հենց Արենիում, դա Արենիի և շրջակա համայնքների բնակիչների աշխատանքի արդյունքն է: «Դուք վերջին 20 տարիներին ձեր աշխատանքի արդյունքում Արենին դարձրել եք Հայաստանի ամենահայտնի բրենդերից մեկը, գինեգործության ամենահայտնի կենտրոններից մեկը:
Եվ սա մի ցայտուն օրինակ է, թե ինչպես մարդիկ աշխատելով կարող են հասնել հեղափոխական արդյունքների: Եթե դուք այդ ամենը չստեղծեիք, Արենի անունը չստեղծեիք և գինու հանրահռչակ փառատոնը այդպիսի բարձր մակարդակով չկազմակերպեիք, այդ ներդրումային ծրագիրը չէր լինի: Այս ներդրումային ծրագիրը մեծ հնարավորություն է ստեղծելու ոչ միայն Արենիի համար, այլև շրջակա բոլոր համայնքների համար»,- եզրափակեց Փաշինյանը: