ԱԱԾ-ն կզբաղվի նրանց հայտարարություններով, ովքեր վստահ քայլերով շարժվում են դեպի պետական դավաճանություն. Փաշինյան (տեսանյութ)
Արցախի քաղաքական իշխանության եւ զինված ուժերի ներկայացուցիչներին պատմել եմ բանակցային ողջ գործընթացի մասին։ Այս մասին այսօր՝ դեկտեմբերի 1-ին, Գորիսում ասաց «Իմ քայլը» դաշինքի առաջնորդ, ՀՀ վարչապետի պաշտոնակատար Նիկոլ Փաշինյանը։
«Լեռնային Ղարաբաղում գտնվելու ընթացքում հրավիրել եմ Արցախի քաղաքական իշխանության եւ զինված ուժերի ներկայացուցիչներին եւ առանց որեւէ մութ անկյուն պահելու նրանց պատմել եմ բանակցային ողջ գործընթացում ինչ-որ տեղի է ունեցել, ինչ-որ իմ մտքում է եւ որոնք են իմ մտադրությունները Ղարաբաղի հարցում։
Ես հայտարարել եմ, որ չի կարող Ղարաբաղի որեւէ հարցի լուծում լինել առանց ՀՀ և Արցախի ժողովրդի կամարտահայտման։ Ես ասել եմ, որ քանի դեռ Արցախը ներգրավված չէ բանակցային գործընթացում, մենք չենք կարող ասել, որ մենք հասել ենք Ղարաբաղի հարցի լուծման փուլին։ Ես ասել եմ, որ ես բանակցում եմ ՀՀ անունից, ես չեմ բանակցում Արցախի անունից Արցախի հարցով եւ Արցախի ժողովրդի անունից կարող է բանակցել միայն Արցախի իշխանությունը։
Էն որ Լեռնային Ղարաբաղի քաղաքական իշխանության եւ զինված ուժերի նեկայացուցիչների հետ քննարկել եմ հարցը, այստեղ հարց կարող է ծագել, բա նրանք ի՞նչ կարծիքի են: Ըստ էության, նրանք իրենց գոհունակությունն են արտահայտել, ես չեմ ուզում ասել երջանկությունը, իմ արտահայտած դիրքորոշումների վերաբերյալ։ Ես նաեւ ասել եմ, որ այն փաստը, որ իմ որդին կամավոր մեկնել է Զինված ուժեր ծառայելու Արցախի Հանրապետությունում, ընդհանրապես էս շղթան վերջնականապես փակում ենք իմ դիրքորոշումների վերաբերյալ»,-ասաց ՆԻկոլ Փաշինյանը։
Փաշինյանի կարծիքով՝ Հայաստանում երբեք չի եղել Արցախի հարցում առավել պրոհայկական դիրքորոշում ունեցող Կառավարություն, քան այսօր․ «Չնայած սրան, Հայաստանում կան քաղաքական ուժեր, որոնք օրումեջ ասում են, որ հեղափոխությունը դավադրություն է Արցախի դեմ եւ Կառավարությունը դավադրություն է պատրաստում Արցախի դեմ եւ մեր Կառավարությունը նենգ մտադրություններ ունի Արցախի դեմ։ Ես անըդհատ մտածում եմ՝ ինչը կարող է դրդել այդ մարդկանց անել հայտարարություններ, որոնց սուտ լինելու մասին գիտեն առաջին հերթին իրենք։ Ու ես անընդհատ մտածում եմ՝ լավ, էս մարդիկ էս հայտարարությունները ինչի են անում, ու անկեղծ ասեմ, որեւէ տրամաբանական բացատրություն չեմ գտնում, բացի նրանից, որ որոշ քաղաքական ուժեր, հասկացել են, որ այս ընտրությունները լինելու են իրենց քաղաքական մահվան արձանագրումը եւ էդ մարդիկ իրենց մոտալուտ, պոտենցիալ քաղաքական մահն արձանագրելով, որոշել են քաղաքական սադրիչ հայտարարություններով դավադիր պատերազմի հրձիգ դառնալ՝ հույս ունենալով, որ կկարողանան հրահրել դավադիր պատերազմ եւ այդ համատեքստում լուծել իրենց նեղ խմբային եւ անձնական շահերը։ Սա շատ լուրջ վարկած է, որովհետեւ ես չեմ կարողանում ուրիշ բացատրություն գտնել»։
Փաշինյանի կարծիքով ՝ այս հայտարարություններով արդեն պետք է զբաղվեն ԱԱԾ-ն եւ ռազմական հակահետախուզությունը։
«Ես կարծում եմ, որ այս ամենը դուրս է միայն արդեն քաղաքական հարթակներում քննարկելու տրամաբանությունից։ Եւ ես կարծում եմ, որ ահա իմ ասած վարկածի ստուգմամբ եւ այդ հայտարարություններով պետք է զբաղվեն Ազգային անվտանգության ծառայությունը եւ ռազմական հակահետախուզությունը, որովհետեւ ոմանք շատ վստահ քայլերով շարժվում են դեպի պետական դավաճանություն։ Եվ ես չեմ վախենում այս հայտարարություն անել եւ ուզում եմ ասել, որ այսօրվա Կառավարությունը եւ Հայաստանի ժողովուրդն ունեն բավարար լծակներ, որպեսզի արմատախիլ անեն մեր զինված ուժերի թիկունքում քայքայիչ գործողություններ անելու փորձեր կատարող որոշ ուժերի։
Եթե որեւէ մեկը ժողովրդական հեղափոխությունը, այսինքն՝ ժողովրդի կողմից ընտրված Կառավարությունը կփորձի կասկածել որեւէ հակազգային եւ որեւէ հակապետական դավադրության մեջ, մենք մեզ իրավունք կվերապահենք այդ մարդկանց կասկածել առնվազն օտարերկրյա ազդեցության գործակալներ լինելու մեջ»,- նշեց Փաշինյանը։
Նիկոլ Փաշինյանը հավելեց, որ Արցախի ժողովուրդը թույլ չի տա, որ որեւէ մեկը մանիպուլյացիաներ անելով ստեղծի տպավորություն, որ Հայաստանի եւ Արցախի մեջ կա որեւէ հակասություն։
«Մեր ժողովուրդն այսօր առավել քան միասնական է։ Եւ ես ուզում եմ գոհունակությամբ արձանագրել, որ Արցախի մի շարք ազդեցիկ քաղաքական ուժեր արդեն իսկ արտահայտվել են այս կապակցությամբ եւ հստակ ասել են, որ թույլ չեն տա խաթարել մեր ազգային միասնությունը հանուն մեր ազգային նպատակների իրագործման։ Ես ասում եմ, որ ոմանք այդ ուղղությամբ շատ լուրջ գազ տված գնում են, որ շատ գազ տվին, հագնելու են պատին, ես ձեզ ասում եմ»,- ընդգծեց Նիկոլ Փաշինյանը։