Երևանում ավարտին է մոտենում «Սու-30» ինքնաթիռների գնման պայմանագրի պատրաստումը

Հայաստանի համապատասխան կառույցները առաջիկայում կավարկեն Ռուսաստանից «Սու-30ՍՄ» կործանիչ ինքնաթիռների գնման պայմանագրի պատրաստումը։ Այս մասին, ըստ ռուսական Тасс գործակալության, հայտնել է Հայաստանի պաշտպանության նախարար Դավիթ Տոնոյանը ռուսական մամուլին այսօր տված ասուլիսի ընթացքում։

Տոնոյանը նշել է, որ ավարտվում են 100 մլն դոլար ծավալով ռազմական վարկի մասին պայմանագրի կնքման աշխատանքները, ինչից լրագրողը բխեցրել է, որ վարկը վերցվում է հենց «Սու-30» կործանիչները գնելու համար։ Մինչ այս չի հրապարակվել, թե կոնկրետ ինչ զինատեսակ գնելու համար է հայկական կողմը վերցնում վարկը։

Խոսքը, ըստ ռուսական աղբյուրի, 2017 թվականին կնքված վարկային համաձայնագրի մասին է, որով Ռուսաստանը համաձայնել էր Հայաստանին տալ 100 միլիոն դոլար վարկային միջոցներ, որոնց ևս առնվազն 10 միլիոն դոլար ավելացնելով՝ Հայաստանը կկարողանար սպառազինություն գնել Ռուսաստանից։ Սա երկրորդ այսպիսի վարկն է․ առաջին վարկը՝ 200 միլիոն դոլար և առնվազն 20 միլիոն դոլար հայկական կողմի համաֆինանսավորում, արդեն կատարվել է, զենքը մատակարարվել է։