Սաշիկ Սարգսյանը ընդերքում էլ 50 տոկոս փայ է ունեցել․ Պետրոս Մակեյանը՝ Նոր Գեղիում
20 տարի շարունակ իշխանությունների հովանու ներքո հանցագործություններ են տեղի ունեցել։ Այս մասին այսօր՝ դեկտեմբերի 1-ին, Կոտայքի մարզի Նոր Գեղի համայնքում նախընտրական քարոզարշավի ժամանակ ասաց «Սասնա ծռեր» կուսակցության պատգամավորության թեկնածու Պետրոս Մակեյանը։
«Բոլորիս հայտնի է, որ 20 տարի ունեցել ենք հանցագործությունների շարք իշխանության հովանու ներքո, ինչի շնորհիվ ահռելի քանակութամբ արտագաղթ, իսկ ովքեր էլ մնացել են, ծայրահեղ աղքատության մեջ են հայտնվել: Արդյունքում վտանգվել է մեր երկրի անվտանգությունը, որի վառ ապացույցը 2016 թվականի քառօրյա պատերազմն էր: Իրավիճակը փրկեց մեր բանակն ու 18 տարեկան երեխաները ժողովրդի հետ միասին: Այդ օրերին իշխանությունը գոյություն չուներ, ավելին՝ Սերժ Սարգսյանը Գերմանիայում նվնվոցը դրել էր, թե կռվում ենք 80-ականների զենքերով: Իսկ այդ ընթացքում Ալիեւը զինում էր Ադրբեջանը: Սրանք ոչ միայն թալանում էին մեր երկիրը, այլեւ չէին զինում բանակը»,-ասաց նա։
Նրա խոսքով՝ հանցագործության վառ օրինակ է այն,որ Սերժ Սարգսյանի եղբայրը ոչ միայն բիզնեսներում է մասնաբաժին ունեցել, այլ նաեւ հանքարդյունաբերության մեջ։
«Երեկ Վարդենիսում բնակիչների հետ հանդիպմանը հետաքրքիր դեպք եղավ. այնտեղ գործող ոսկու հանքը շահագործում են ռուսները, ինչը դժգոհության ալիք է բարձրացնում տեղացիների շրջանում, բայց օգուտը քաղում է Սաշիկ Սարգսյանը: Ասում են՝ երբ երկրի ղեկին Սերժ Սարգսյանն էր, ամեն օր մեքենաներով բարձած Սաշիկ Սարգսյանի համար հանքանյութ է հանվել այնտեղից: Ստացվում է, որ ասում են 50-50, մենք գիտենք միայն բիզնեսները, բայց պարզվում է երկրի ընդերքում էլ նա 50 տոկոս փայ է ունեցել: Այսպիսի ղեկավարության օրոք ենք ապրել: Փառք Աստծո, գարնանային հեղափոխությունը կազմալուծեց հանցավոր այս համագործակցությունը, բայց համակարգը դեռ մնում է. դա մարտի 1-ի կոալիցիոն ուժն է, որն ամեն վայրկյան կարող է երկրում իրավիճակ փոխել, քանի որ մեծ ֆինանսական միջոցներ ունեն»,-ասաց Մակեյանը:
Պետրոս Մակեյանը եզրափակեց, որ չպետք է թույլ տալ, որ այդ հանցավոր խումբը վերադառնա․ «Լավագույն տարբերակը «Սասնա Ծռերն» են եւ ժամանակն է, որ ժողովուրդը հատուցի այդ տղաներին»:
Նշենք, որ ԱԺ արտահերթ ընտրությունները տեղի կունենան դեկտեմբերի 9-ին։ Ընտրություններին մասնակցում է 11 կուսակցություն եւ կուսակցությունների դաշինք։ Այսօր նախընտրական քարոզարշավի 6-րդ օրն է։