Հայաստանի մշտական բնակչության թվաքանակը 2017-ի հունվարի համեմատ նվազել է 13 400-ով. ԱՎԾ
Ըստ ԱՎԾ-ի կողմից հրապարակված «2017-ի Հայաստանի սոցիալական պատկերը և աղքատությունը» վիճակագրական-վերլուծական զեկույցի՝ 2012-ից մինչ 2018–ը տարեսկիզբն ընկած ժամանակահատվածում բնակչության թվաքանակը նվազել է 1.6 %-ով, տարեկան միջին հաշվով նվազումը կազմելով՝ 0.4%:
2018թ. հունվարի 1-ի դրությամբ ՀՀ մշտական բնակչության թվաքանակի ցուցանիշը կազմել է 2 972.7 հազ.մարդ և 2017թ. տարեսկզբի համեմատ այն նվազել է 13.4 հազ.մարդով :
2018թ. տարեսկզբի դրությամբ արձանագրված ՀՀ մշտական բնակչության կազմում քաղաքային բնակչության տեսակարար կշիռը կազմել է 63.8%, իսկ գյուղականինը՝ 36.2%: ՀՀ մշտական բնակչության 47.4 %-ը կազմել է արական, իսկ 52.6%-ը` իգական սեռի բնակչությունը: Բնակչության միջին տարիքը, 2017-ի տարեսկզբի դրությամբ, կազմել է 36.4 տարի և ձևավորվել է 3.7 տարվա խզվածք արական և իգական սեռերի միջև, որոնք կազմել են համապատասխանաբար՝ 34.5 և 38.2 տարին:
Ըստ զեկույցի՝ պտղաբերության (ծնելիության գումարային) գործակիցը` ծնունակ տարիքի (15-49 տարեկան) մեկ կնոջ հաշվով 2017թ. կազմել է 1.576 միավոր, 2016թ.՝ 1.647 միավորի համեմատ, ինչը զգալիորեն ցածր է բնակչության պարզ վերարտադրության 1 համար անհրաժեշտ` 2.150 ցուցանիշից:
2017թ. մոր միջին տարիքը երեխայի ծննդյան ժամանակ կազմել է 27.0 տարի, առաջին երեխայի ծննդյան ժամանակ` 24.8 տարի, 2016թ. համապատասխանաբար` 26.8 և 24.7 տարվա համեմատ: Ըստ ծննդի հաջորդականության` երրորդ և բարձր կարգի ծնունդները 2017թ. կազմել են հանրապետության կենդանի ծնվածների ընդհանուր թվաքանակի 22.3 % և նախորդ տարվա համեմատ ցուցանիշն աճել է 3.0 %-ային կետով:
2017-ին գրանցված կենդանի ծնվածների շուրջ 33.0%-ն արձանագրվել են չգրանցված ամուսնություններից (այդ թվում` արտաամուսնական), 2007-ի՝ 35.5%-ի և 1997-ի՝ 32.4% համեմատ: 2017-ին` նախորդ տարվա համեմատ, արձանագրվել է մահվան դեպքերի նվազում` 3.8%-ով, իսկ մահացության ընդհանուր գործակցը նվազել է՝ 0.3 պրոմիլային կետով և կազմել 9.1 պրոմիլ: Ընդ որում, մահացության գործակիցը, համեմատաբար, ավելի բարձր է քաղաքային բնակչության շրջանում՝ 9.2, քան գյուղականում՝ 9.0 պրոմիլ:
2017-ին արձանագրված մահացության կառուցվածքում` 51.0%-ը կազմել են արական, իսկ 49.0%-ը` իգական մահվան դեպքերը, 2007-ին արձանագրված, համապատասխանաբար՝ 51.9% և 48.1%-ի համեմատ:
Մահացության հիմնական պատճառներն ըստ զեկույցի՝ մահացության կառուցվածքում գերակշռում են արյան շրջանառության համակարգի հիվանդություններից և չարորակ նորագոյացություններից արձանագրված դեպքերը, որոնք կազմում են մահացության ընդհանուր դեպքերի ավելի քան երկու երրորդը: